Punëtorët e sektorit publik të pakënaqur me pagat
Bardha Shkreli / Radio Kosova
Shumë punëtorë të sektorit publik janë të pakënaqur me pagat e ekzekutuara dje në bazë të koeficientit 105 euro. Disa sindikata janë ende duke pranuar ankesa nga anëtarësia derisa thonë se në ditët në vazhdim do të vendosin për metodën e reagimit. Në zyrën e Avokatit të Popullit deri më tani kanë arritur 40 ankesa, për këtë çështje.
Shumë pjesëtarë të Policisë së Kosovës janë shprehur të pakënaqur me pagat e ekzekutuara në bazë të koeficientit 105 euro. Kryetari i Sindikatës së Policisë së Kosovës, Imer Zeqiri, thotë se zhgënjimet lidhen edhe me heqjen e shtesës së rrezikshmërisë që deri më tani ka ekzistuar për policët në uniformë.
“Shumica prej tyre janë të zhgënjyer me atë çka kanë pranuar për arsye se te pjesa e uniformuar e policisë –pagat kanë dalë pa shtesën e rrezikshmërisë, e që unë mendoj, se policët pa rrezikshmëri nuk e di a ka ndonjë vend në botë që është kështu (ne këtë shtesën e rrezikshmërisë deri më tani e kemi pranuar). Dhe, pjesa e stafit civil – një pjesë shumë e madhe nuk kanë ngritje të pagës, deri më tani pakënaqësitë janë të mëdha”, tha Zeqiri për Radio Kosovën.
Të pakënaqur me pagat e ekzekutuara mbrëmë janë shprehur edhe punëtorët shëndetësorë. Kryetari i Sindikatës së Qendrës Terciare, Xhemajl Selmani, thotë se stafi i mesëm dhe ai mbështetës, me koeficientin e caktuar së fundmi, kanë rreth 100 euro më pak.
“Pakënaqësia ekziston sidomos te infermierët por edhe te stafi mbështetës, sepse ata janë 100 euro mangët në raport me pagat që kanë marrë më përpara, ndërsa infermierëve kur u janë hequr shtesat ka mbetur paga aq sa ka qenë, ndërsa për sa i përket stafit të mjekëve është një rritje e ndjeshme”, tha ai për Radio Kosovës.
Selmani thotë se për stafin e ortoprotetikës tashmë kanë marrë vendim që çështjen ta adresojnë te Avokati i Popullit. Sindikata e Shërbimit Spitalor Klinik Universitar, ditët e ardhshme do të mbajë mbledhjen e këshillit drejtues ku do të vendoset për hapat e mëtutjeshëm të reagimit.
Ndryshe, Zyra e Avokatit të Popullit, përmes zëdhënësit Petrit Çollaku, ka njoftuar se deri sot në mesditë kanë pranuar 40 ankesa për këtë çështje.























