Manchester United deklason Real Betisin
Uran Krasniqi/RTKLive
Manchester United e ka zgjatur serinë e mosmposhtjes në "Old Trafford" për njëzet ndeshje sonte kur e ka mposhtur Real Betisin 4-1 në ndeshjen e parë të fazës nokaut në Europa League, me dy skuadrat që kërkojnë një vend në çerekfinale.
Rezultati përfundimtar ka qenë 4-1.
Buzëqeshja në fytyrën e Erik ten Hag është dukur shpejt, kur vetëm pas gjashtë minutash lojë Marcus Rashford ka gjetur golin, duke i dhënë epërsinë skuadrës së drejtuar nga holandezi.
Ayoze Perez ia ka dalë që ta barazojë rezultatin në minutën e tridhjetë e dytë.
Dyzet e pesë minutat e para u mbyllën baras 1-1.
Por për Betisin goli i realizuar ka qenë krejt ajo çfarë ka mundur të bëjë. Pjesa e dytë ka sjellur edhe tre gola të tjerë nga United. Fillimisht Antony ka rikthyer epërsinë e “Djajve të Kuq” në minutën e pesëdhjetë e dytë me një gol të bukur. Vetëm gjashtë minuta më vonë, mesfushori portugez Bruno Fernandes kësaj radhe gjeti golin e parë personal në këtë sfidë duke ngritur epërsinë në 3-1. Goditjen e katërt Betisit ia ka dhënë sulmuesi holandez Weghorst në minutën e 84-të.
Ndeshja e kthimit zhvillohet pas një jave.























