Në një deklaratë lidhur me bombardimet  e NATO-s ndaj ish Jugosllavisë (Serbi e Mal i Zi) 24 vjet më parë,  misioni i SHBA-së në Organizatën për Siguri dhe Bashkëpunim në Evropë (OSBE), rikujton arsyet e asaj çfarë ka ndodhur.

Në këtë deklaratë, shkruan se operacionet e Aleancës Veri-Atlantike nisën për t’i dhënë fund një dekade gjakderdhjeje në Ballkan.

Elisabeth Rosenstock-Siller, ushtruese e detyrës së zëvendës-shefes të Misionit, thekson se  ndërhyrja e NATO-s ndodhi pasi kishin shteruar të gjitha rrugët diplomatike për t’i dhënë fund një fushate brutale të spastrimit etnik të sponsorizuar nga regjimi i Millosheviqit.

“Njëzet e katër vjet më parë, NATO nisi Operacionin Forcat Aleate për t’i dhënë fund një dekade gjakderdhjeje në Ballkan”, shkruan në deklaratë.

“Kjo ndërhyrje erdhi vetëm pasi kishte shteruar të gjitha rrugët diplomatike për t’i dhënë fund një fushate brutale të spastrimit etnik të sponsorizuar nga regjimi i Millosheviqit”.

Në deklaratë shkruan se përdorimi i forcës nga NATO në këtë rast ishte i domosdoshëm dhe legjitim.

“Këshilli i Sigurimit i OKB-së kishte shprehur shqetësimet e tij për situatën e rëndë humanitare në Kosovë, numrin në rritje të refugjatëve dhe kërcënimin që paraqet për paqen dhe sigurinë ndërkombëtare”, rikujton Misioni amerikan në OSBE.

“Kujtoni qindra mijëra njerëz të pafajshëm të dëbuar nga shtëpitë e tyre dhe mijëra të vrarë ose të zhdukur për shkak të dhunës së regjimit etno-nacionalist të Millosheviçit dhe forcave të tij”.

Në deklaratë rikujtohet se është detyrë e qeverive të Serbisë dhe Kosovës që të sigurojnë që të gjitha viktimat dhe familjet e tyre të kenë qasje të plotë në drejtësi dhe informacion për fatin e të dashurve të tyre.

“Ne u bëjmë thirrje të dyja qeverive që të mbështesin përpjekjet për drejtësi dhe llogaridhënie, duke përfshirë edhe fjalimet kundër glorifikimit të kriminelëve të luftës”.

“Ndjejmë keqardhje të thellë për humbjen e jetëve të pafajshëm, përfshirë ata që humbën jetën gjatë Operacionit të Forcave Aleate”, shkruan në këtë deklaratë, të publikuar edhe faqen zyrtare të Misionit amerikan në OSBE.

“Kur vizitoi Beogradin në vitin 2016, Presidenti Biden shprehu ngushëllimet e tij personale për familjet e atyre që humbën jetën gjatë luftërave të viteve 1990, përfshirë ato si rezultat i fushatës ajrore të NATO-s”, rikujtohet më tej.

“Megjithatë, nuk duhet harruar asnjëherë se si filloi ky konflikt dhe pse”.

Në deklaratë theksohet se  Shtetet e Bashkuara mbështesin fuqimisht një të ardhme demokratike, të begatë dhe paqësore për Ballkanin Perëndimor dhe mirëpret marrëveshjen e arritur nga Kosova dhe Serbia përmes lehtësimit të Bashkimit Evropian për zbatimin e Marrëveshjes për Rrugën e Normalizimit të Marrëdhënieve.

“Siç tha sekretari Blinken, Shtetet e Bashkuara do të mbeten të angazhuara në mënyrë aktive, në koordinim me partnerët e BE-së, për të mbështetur Serbinë dhe Kosovën në funksionimin e zbatimit në ndjekje të një marrëdhënieje të parashikueshme dhe paqësore”.

Ky msion përsërit se do të vazhdojnë  të mbështesë avancimin e qeverisjes demokratike, marrëdhëniet e fqinjësisë së mirë dhe prosperitetin në Ballkanin Perëndimor.

“Le të nderojmë kujtimin e atyre që humbën duke punuar së bashku për të ndërtuar një të ardhme paqeje dhe prosperiteti për të gjithë në Ballkanin Perëndimor”.