Eurodeputetët e Komitetit të Parlamentit Evropian për Punët e Jashtme kanë miratuar një raport për angazhimin e Shqipërisë në integrimin në BE, ku e kanë cilësuar atë si një aleate të rëndësishme gjeopolitike për BE dhe një partnere të besueshme.

Për këtë eurodeputetët kanë vlerësuar rolin e Shqipërisë për rritjen e bashkëpunimit rajonal dhe marrëdhëniet e fqinjësisë së mirë në Ballkan.

“Shqipëria është një partner i besueshëm i politikës së jashtme dhe mbetet një aleat i rëndësishëm gjeopolitik falë përpjekjeve të saj për të çuar përpara bashkëpunimin rajonal dhe marrëdhëniet e fqinjësisë së mirë. Mirëpresim që qeveria ka mbajtur fokusin e saj në reformat në lidhje me BE-në, ka përforcuar strukturën e saj koordinuese për integrimin evropian dhe rolin e parlamentit në procesin e integrimit në BE duke amenduar ligjin përkatës dhe u bëjnë thirrje vendimmarrësve të punojnë së bashku drejt përmbushjes së kritereve të anëtarësimit jo më vonë se 2030”, thuhet në raport.

Përtej vlerësimeve për punë e bërë me ecjen para të reformave për integrimin e vendit, në raport theksohen edhe fushat ku Shqipëria duhet të bëjë më shumë, nga bashkëpunimi me opozitën dhe krijimit të kulturës parlamentare konstruktive, luftimi i korrupsionit në nivele të larta,  përmirësimi i kuadrit ligjor të lirisë së mediave si dhe plotësimin e reformës zgjedhore para zgjedhjeve parlamentare të 2025.

Raporti u miratua ditën e sotme (24 maj) me 52 vota pro, 5 kundër dhe 10 abstenim, ndërsa raportuesja për Shqipërinë në PE, Isabel Santos tha se votimi i këtij raporti është vlerësim për përpjekjet e Shqipërisë drejt rrugës së saj europiane.

"Shqipëria ka demonstruar një angazhim të thellë në procesin e integrimit duke zbatuar reforma të vështira. Rezultati i votimit të sotëm tregon njohjen e këtyre përpjekjeve nga Parlamenti Evropian dhe përafrimin e plotë të Shqipërisë me BE-në e Jashtme të Përbashkëta. dhe Politika e Sigurisë. Është njohja e meritës së treguar nga vendi në rrugën e tij drejt anëtarësimit në BE.", tha Santos.

Eurodeputetët e Komitetit të Parlamentit Evropian për Punët e Jashtme thanë gjithashtu se qeveria duhet të bashkëpunojë me opozitën për të ecur para me reformat, ndërsa dënuan retorikën nxitëse mes politikanëve.

“Dënojmë  konfrontimin e qëndrueshëm politik, veprimet përçarëse dhe retorikën nxitëse nga politikanët dhe zyrtarët e nivelit të lartë, duke theksuar rëndësinë e ndërtimit të një kulture parlamentare konstruktive duke nxitur konsensusin midis të gjithë aktorëve politikë”, thuhet në raport.

Eurodeputetët shprehën keqardhjen që partitë kryesore politike nuk arritën një marrëveshje për reformën zgjedhore dhe “u bëjnë thirrje autoriteteve shqiptare që të zbatojnë urgjentisht ndryshimet e pazgjidhura në kuadrin e financimit të zgjedhjeve dhe partive, shumë përpara zgjedhjeve parlamentare të 2025-ës”.

Eurodeputetët i kërkojnë qeverisë të intensifikojë përpjekjet e saj në forcimin e funksionimit të shtetit të së drejtës, gjyqësorit, kundër korrupsionit dhe krimit të organizuar.

“Nevojiten përpjekje më të strukturuara dhe të qëndrueshme për të luftuar korrupsionin, përfshirë në nivele të larta dhe nevojën për të trajtuar kulturën e mosndëshkimit. Duhen rezultate shtesë në luftën kundër krimit kibernetik, trafikimit të qenieve njerëzore dhe pastrimit të parave”, thuhet në raport.

Një tjetër pikë e rëndësishme është edhe liria e mediave, ku për eurodeputetët ka pasur një përkeqësim të situatës.

“Shprehim keqardhje për mungesën e progresit në arritjen e transparencës institucionale dhe përkeqësimin e situatës së lirisë së shprehjes dhe lirisë së medias dhe u bëjmë thirrje autoriteteve të miratojnë një kornizë ligjore që mbron gazetarët, mbrojtësit e të drejtave të njeriut dhe palët e tjera të interesuara nga paditë strategjike kundër pjesëmarrjes publike”, thuhet në raport.

Së fundi, eurodeputetët vënë në dukje se Shqipëria është shënjestruar shumë nga dezinformimi rus dhe sulme të tjera hibride dhe duhet të forcojë mbrojtjen e infrastrukturës në sigurinë kibernetike.