Nis takimi Osmani-Scholz-Macron në Moldavi |Foto
Jeton Musliu/RTKlive
(Plotësuar) Disa orë më herët sesa ishte parashikuar, ka filluar takimi mes presidentes së Kosovës, Vjosa Osmani-Sadriu me kancelarin e Gjermanisë, Olaf Sholz dhe presidentin Francës, Emanuel Macron.
Takimi është duke u mbajtur në Kishinau të Moldavisë në margjinat e samitit të dytë të Komunitetit Politik Evropian.
Pritet që temë kryesore e takimit të jetë situata e fundit e sigurisë në rajon e në veçanti, ajo në veri të Kosovës.
Takimi trepalësh ishte planifikuar të mbahet rreth orës 17:00, por i njëjti tashmë ka filluar.
Siç shihet edhe nga fotografitë e dërguara nga kameramani i RTK-së, Krenar Statovci, i cili po përcjell nga afër këtë ngjarje, në njërën anë janë të ulur kancelari Scholz e presidenti Macron.
Ndërkohë, në anën tjetër, presidentja Osmani është e shoqëruar nga shefi i kabinetit, Blerim Vela dhe ambasadori i Kosovës në Bruksel, Agron Bajrami.


LAJMI I FUNDIT: Takimi Osmani-Scholz-Macron sot rreth orës 17:00 në Moldavi
Kosova po përfaqësohet në samitin e dytë të Komunitetit Politik Evropian, që po mbahet në kryeqytetin e Moldavisë, Kishinau, nga presidentja Vjosa Osmani-Sadriu.
Pas pjesës formale të mbajtjes së samitit, liderët e 43 vendeve të Evropës dhe BE-së janë duke realizuar takime të shumta mes tyre për të diskutuar çështje të ndryshme.
Megjithatë, siç raporton gazetari i RTK-së, Valon Bajrami, i cili ndjek nga afër këtë samit në kryeqytetin moladv Kishinau, pritet që në orët e pasdites, presidentja Vjosa Osmani-Sadriu, do të ketë takime me kancelarin e Gjermanisë, Olaf Scholz dhe presidentin Francës, Emanuel Macron.
Takimi do të jetë trepalësh dhe pritet që të diskutohen zhvillimet e fund në rajon e në veçanti në pjesën veriore të Kosovës.
Takimi është paralajmëruar se mund të ndodhë rreth orës 18:00 sipas kohës lokale në Moldavi, ose orës 17:00 sipas kohës lokale në Kosovë.
Samiti i Komunitetit Politik Evropian zhvillon punimet në Republikën e Moldavisë, në Kalanë Mimi në komunën Bulboaca të kryeqytetit Kishinau.
Liderët evropianë diskutojnë çështje që lidhen me sigurinë e kontinentit evropian në kontekstin e agresionit ushtarak të Federatës Ruse në Ukrainë e sigurinë energjetike.
Në prag të ngjarjes, presidentja e Republikës së Moldavisë, Maia Sandu, deklaroi se ky takim do të forcojë dialogun politik ndërmjet vendeve anëtare të BE-së dhe atyre jashtë, do të ofrojë mundësi reale për ndërlidhjen e Republikës së Moldavisë në BE.























