Kurti: Kosova e përkushtuar për burimet e ripërtëritshme dhe dekarbonizimin
BKT
Fot: Zyra e Kryeministrit të Kosovës
Lajme

Kurti: Kosova e përkushtuar për burimet e ripërtëritshme dhe dekarbonizimin

M.Sh/RTKlive

Kryeministri Albin Kurti, shprehu mirënjohje për Bankën Botërore dhe Fondin Monetar Ndërkombëtar për mbështetje drejt stabilitetit dhe prosperitetit ekonomik, derisa tha se Kosova është e përkushtuar për të përqafuar burimet e ripërtëritshme të energjisë dhe dekarbonizimin.

Në pritjen e organizuar nga Ministria e Financave, Punës dhe Transfereve dhe Banka Qendrore e Kosovës, për përfaqësuesit e lartë të këtyre dy institucioneve, Kurti tha se Kosova me këto institucione po krijon lidhje edhe më të forta për zhvillim.

Në këtë pritje, Kurti tha se prezenca e këtyre përfaqësuesve, simbolizon angazhimin dhe bashkëpunimin mes vendeve dhe me institucione me famë si Grupi i Bankës Botërore dhe Fondi Monetar Ndërkombëtar.

Ai tha se ky organizim i sontëm është jo vetëm për të festuar qëllimet dhe aspiratat e përbashkëta, por edhe për të krijuar lidhje më të forta që do të nxisin zhvillimin dhe përparimin e qëndrueshëm.

“Më lejoni të shpreh mirënjohjen time për Grupin e Bankës Botërore dhe FMN-në për mbështetjen e tyre të çmuar në rrugëtimin e Kosovës drejt stabilitetit dhe prosperitetit ekonomik. Ne e njohim rolin kritik që luajnë këto institucione në ofrimin e ekspertizës teknike, asistencës financiare dhe këshillave për politikat për vendet që përpiqen për përparim socio-ekonomik, si dhe përparimin shumë të prekshëm që rezulton nga kjo punë”, tha kryeministri Kurti.

Kryeministri Kurti theksoi se vitet e fundit ne kemi bërë përparime të rëndësishme në sektorë të ndryshëm, duke përfshirë zhvillimin e infrastrukturës, arsimin dhe kujdesin shëndetësor. Megjithatë, ai tha se jemi të vetëdijshëm se ka ende shumë punë për të bërë.

Kurti  theksoi përkushtimin për rritjen e qëndrueshme ekonomike, krijimin e vendeve të punës dhe çrrënjosjen e varfërisë, si shtytësit kryesorë për arritjen e qëllimeve afatgjata, thuhet në njoftimin e Kryeministrisë.

“Jemi të përkushtuar për zbatimin e reformave që do të përmirësojnë mjedisin tonë të biznesit, do të tërheqin investime të huaja dhe do të nxisin inovacionin. Qeveria jonë është e vendosur të sigurojë transparencë, llogaridhënie dhe qeverisje të mirë në të gjithë sektorët. Duke vepruar kështu, ne synojmë të krijojmë një mjedis që promovon rritjen e sektorit privat, përmirëson kushtet për ndërmarrësi dhe nxitë një ekosistem ku idetë mund të lulëzojnë”, tha kryeministri.

 


MË SHUME NGA Lajme