Komisioni miraton Projektligjin për çmimin e produkteve medicinale
Arbresha Berisha | RTK
(I plotësuar) Në Komisionin për Shëndetësi dhe Mirëqenie Sociale ka kaluar Projektligji për çmimin e produkteve medicinale.
Mbledhja e paraparë të nisë në orën 10:00 dështoi, pasi deputetët e partisë në pushtet nuk ishin të pranishëm, por të njëjtit u mblodhën pas më shumë se gjysmë ore për ta kaluar këtë projektligj.
E këtë herë nga opozita në mbledhje mori pjesë vetëm deputeti i PDK-së, Bekim Haxhiu.
Ai tha për RTK-në se asnjë nga kërkesat e opozitës nuk janë marrë parasysh nga deputetët e mazhorancës.
Me këtë rast, ai, u shpreh se me kalimin e projektligjit do të dëmtohen prodhuesit vendor.
Por ndryshe u shprehën anëtarët e Komisionit nga mazhoranca, të cilët thanë se me kalimin e këtij projektligji do t’i jepet fund abuzimit me çmimet për barna.
Dështon mbledhja e Komisionit për Shëndetësi dhe Mirëqenie Sociale
Komisioni për Shëndetësi dhe Mirëqenie Sociale ka dështuar të mbajë mbledhjen e paraparë për sot në orën 10:00, ku në rend dite ishte shqyrtimi i projektligjit për çmimin e produkteve medicinale.
Kjo ndodhi pasi në mbledhje nuk u paraqiten deputetët e partive në pushtet. Ndërsa, ata të opozitës pasi pritën për rreth 20 minuta vendosën që të largohen nga mbledhja.
Deputetë të opozitës thanë se pozita nuk është e interesuar që ta implementojë këtë ligj.
“Kjo është papërgjegjësi totale”, tha deputeti i LDK-së, Armend Zemaj, pas dështimit të mbledhjes së këtij komisioni.























