Policia: Po mbledhim informata për keqtrajtimin e 3-vjeçarit nga edukatoret
V.Shala e A.Bela /RTK
(E plotësuar, ora 15:30) Policia e Kosovës njofton se është informuar lidhur me shqetësimet e ngritura në publik pas pamjeve të publikuara ndërlidhur me pretendimet për sjellje të papërshtatshme, në kundërshtim me etiken, apo me nuanca dhune, nga ana e disa edukatoreve në një kopsht fëmijësh në Fushë Kosovë.
"Pas publikimit të pamjeve të tilla ne kemi marrë seriozisht pretendimet e ngritura dhe menjëherë kemi filluar një hetim preliminar për çështjen. Aktualisht zyrtarët policor po vijojnë punën për mbledhjen e të gjitha provave që janë të arritshme, intervistimin e personave që në çfarëdo rrethane dhe çfarëdo cilësie kanë mundur të jenë të implikuar në rast, po shqyrtohen raportet mjekësore, pamjet e publikuara si dhe po analizohen ato", njofton Policia e Kosovës.
Veprimet policore po koordinohen me prokurorin e shtetit si dhe po bashkëpunojmë ngushtë me të gjitha agjencitë për mbrojtjen e fëmijëve dhe autoritet e tjera përkatëse.
"Ndonëse e kuptojmë interesin e publikut për çështjen, si dhe shqetësimin e komunitetit e veçmas prindërve dhe kujdestarëve, ne duhet të jemi të vëmendshëm për të balancuar nevojën për transparencë me nevojën për të mbrojtur integritetin e hetimit",", njofton Policia e Kosovës.
Sipas Policisë, siguria dhe mirëqenia e fëmijëve është ndër prioritetet kryesore por njëkohësisht jemi të përkushtuar për të kryer një hetim profesional dhe të paanshëm, për të zbardhur të vërtetën dhe për të ndërmarrë veprimet e duhura bazuar në gjetjet e hetimit.
"Vlerësojmë komunitetin për mirëkuptimin dhe sigurojmë që ne nuk do të kursejmë asnjë përpjekje që vendi ynë të mbetet i sigurt për të gjithë", njofton Policia e Kosovës.
Edukatoret e dyshuara për dhunën ndaj 3 vjeçarit po intervistohen në polici
Drejtori i Arsimit në Fushë Kosovë, Fatlum Berisha, është deklaruar për media pas rastit të dhunës ndaj një 3 vjeçari, në çerdhen “Gëzimi ynë”, në Fushë Kosovë.
Ai ka bërë të ditur se edukatoret që pretendohet të jenë të përfshira në rast po intervistohen nga policia aktualisht.
Foto: Valjeta Shala/ RTK
Ndërkaq nga Policia e Kosovës kanë njoftuar se Policia në koordinim me prokurorinë, qendrën për punë sociale janë duke u marrë me këtë rast.
Për detaje tjera do të njoftohet pasi të përfundon faza fillestare e hetimit.
Avokati Nasuf Hasani tha se në këtë rast janë kryer tri vepra penale. Ndërsa nëna e 3-vjeçarit, Fitore Geci tha se ndjehet mjaftë e shqetësuar.

Për rastin reagoi edhe ministrja e Arsimit, Arbërie Nagavci dhe ajo e Drejtësisë, Albulena Haxhiu.
Inspektorët e Ministrisë së Arsimit, Shkencës, Teknologjisë dhe Informacionit, sot, kanë shkuar në çerdhen “Gëzimi Ynë” në Fushë Kosovë, ky dyshohet se një 3-vjeçar është rrahur nga edukatoret e këtij institucioni.























