Serbia e falënderon Rusinë që s’e pranon pavarësinë Kosovën
SH.Ç/RTKlive
Ministri i Punëve të Jashtme të Serbisë, Ivica Daçiq, gjatë takimit me homologun e tij rus Sergey Lavrov, në Moskë, ka shprehur “shumë lëvdata e falënderime” për Federatën Ruse, për mosnjohjen e pavarësisë së Kosovës.
“Ne jemi fort falënderues ndaj Rusisë, kur vije puna te mbështetja e sovranitetit dhe integritetit territorial të Serbisë. Përkrahja që na ofroni sa i përket Kosovës, është shumë e rëndësishme për ne. Dhe personalisht të falënderoj ty për mirëkuptimin dhe ndihmën e madhe që na ke ofruar, në secilën situatë , kur ne ju kemi kërkuar ndihmë”, ka deklaruar Daçiq.
Kurse, Lavrov i cilësoi raportet ruso-serbe të jashtëzakonshme. Në takim njoftohet se është thënë se meritë për këtë aleancë kanë presidentët e dy shteteve.
Kryetari i Serbisë Aleksandër Vuçiq, është ndër presidentët e rrallë që i dërgoi letër uruese për rizgjedhje në krye të Kremlinit, Vladimir Putinit. Ky proces zgjedhor kontestohet nga bota perëndimore. Ndërkohë që janë bërë dy vjet qëkur Rusia ka nisur pushtimin ushtarak të Ukrainës.
Serbia përkundër thirrjeve të shumta ndërkombëtare, deri tani ka refuzuar që t’i vendos sanksione Rusisë.























