Osmani: Të fuqizohen të gjitha hallkat e shtetit në siguri dhe drejtësi
F.Sertolli / RTKlive
Presidentja e Kosovës, Vjosa Osmani, pas rasteve të fundit të vrasjes së grave, ka mbajtur sot një takim me ministrin e Punëve të Brendshme, Xhelal Sveçla, ministren e Drejtësisë, Albulena Haxhiu dhe drejtorin e përgjithshëm të Policisë, Gazmend Hoxha.
Në këtë takim, sipas njoftimit për media, presidentja Osmani ka shprehur shqetësimin e saj të thellë në lidhje me trendin alarmues të vrasjes së grave.
Me këtë rast Osmani ka shprehur nevojën urgjente që të fuqizohen të gjitha hallkat brenda institucioneve të sigurisë dhe drejtësisë, të cilat kanë detyrim kushtetues që ta mbrojnë jetën e qytetarëve tanë.
“Përgjatë takimit u diskutua edhe nevoja e rritjes së ndëshkimeve e po ashtu për ndryshimet e nevojshme në Kodin Penal. Presidentja Osmani, ditëve në vijim do të zhvillojë takime me institucione të tjera relevante, me kërkesën për rritjen e masave parandaluese, reaguese dhe ndëshkuese në raport me kryesit e këtyre veprave”, thuhet në njoftimin për media.























