Osmani uron vitin e ri shkollor: Qoftë një vit me suksese të panumërta
N.M. /RTKlive
Presidentja e vendit, Vjosa Osmani, ka uruar që ky vit i ri shkollor të jetë një udhëtim me suksese dhe mësime të vlefshme.
Ajo ka uruar dhe mësimdhënësit, duke kërkuar nga ta që të vazhdojnë t’i frymëzojnë nxënësit me pasion dhe përkushtim.
“Të dashur nxënës, sot nisë një kapitull i ri plot me mundësi për ju. Të nderuar mësimdhënës, vazhdoni t’i frymëzoni mendjet e reja me pasion dhe përkushtim. Qoftë ky vit një udhëtim me suksese të panumërta dhe mësime të vlefshme që do t'ju udhëheqin gjatë gjithë jetës!”, thuhet në urimin e presidentes Osmani.
Presidentja Osmani tha se fillimi i vitit të ri shkollor është ditë e veçantë për nxënësit, por po kaq shumë edhe për prindërit dhe mësuesit.
“Është dita kur oborret e shkollave gumëzhijnë nga zërat e gëzuar të nxënësve që kthehen nga pushimet verore, nga përqafimet mes shokëve dhe shoqeve që nuk janë parë për një kohë të gjatë, dhe nga sytë plot kuriozitet të atyre që hyjnë për herë të parë në tempullin e dijes. Ky gëzim, ky entuziazëm dhe kjo energji që ndihet në çdo kënd të shkollës na rikujton edhe një herë se shkolla është vendi ku formësohen ëndrrat, zhvillohen talentet dhe ngriten themelet për një të ardhme më të mirë”, ka thënë Osmani.
Sipas saj, përtej simbolikës së ditës së parë të shkollës, suksesi i arsimit varet nga angazhimi ynë i përbashkët për të krijuar një mjedis të sigurt dhe mbështetës për nxënësit dhe mësimdhënësit tanë.
“Shkolla mbetet investimi më i rëndësishëm për çdo shoqëri që e do përparimin dhe zhvillimin. Aty ku arsimi cilësor dhe përkushtimi janë prioritet, aty rriten gjeneratat që do të ndërtojnë të ardhmen e shëndoshë e përparimtare të shtetit tonë. Të dashur nxënës, sot nisë një kapitull i ri plot me mundësi dhe ëndrra për t'i realizuar. Të nderuar mësimdhënës, vazhdoni t’i frymëzoni zemrat dhe mendjet e reja me pasion dhe përkushtim”, thuhet tutje në urimin e presidentes Osmani.
























