Plani ROADPOL, policia kontrollon mbi 10 mijë automjete
BKT
Foto arkiv
Lajme

Plani ROADPOL, policia kontrollon mbi 10 mijë automjete

RTKlive

Në kuadër të javës së aktiviteteve të Rrjetit Evropian të Policive Rrugore “ROADPOL 2025”, e cila u zhvillua nga data 6 deri më 12 tetor 2025, Policia e Shtetit ka intensifikuar prezencën dhe kontrollet në të gjitha rrugët e vendit, duke kontrolluar mbi 10 mijë automjete.

Qëllimi i këtyre aktiviteteve ishte rritja e sigurisë në trafikun rrugor dhe parandalimi i aksidenteve, me theks të veçantë tek ndërgjegjësimi i drejtuesve të automjeteve për rëndësinë e përqendrimit gjatë ngasjes.

Fushata është zhvilluar nën moton “Përqendrohu në rrugë”, duke vënë në fokus mospërdorimin e telefonit celular gjatë drejtimit të mjetit, respektimin e kufizimeve të shpejtësisë dhe përdorimin e rripit të sigurisë.

Rezultatet e aktiviteteve të realizuara nga njësitë e trafikut rrugor janë si më poshtë:

“Janë ngritur 1,702 pika kontrolli për automjetet; Janë kontrolluar 10,416 automjete në të gjithë vendin; Janë shqiptuar 385 gjoba për përdorim të telefonit gjatë ngasjes; Janë shqiptuar 4,908 gjoba për tejkalim të shpejtësisë; Janë shqiptuar 312 gjoba për mospërdorim të rripit të sigurisë”, thuhet në njoftim.

Policia e Shtetit apelon për respektim të rregullave të qarkullimit rrugor dhe kujdes të shtuar gjatë drejtimit të automjetit, me qëllim që çdo udhëtim të përfundojë i sigurt.


MË SHUME NGA Lajme