Sveçla për 8 Marsin: Gratë faktor i rëndësishëm për paqen dhe sigurinë
Valbona Thaçi / RTKLive
Ministri i Punëve të Brendshme, Xhelal Sveçla, ka uruar gratë me rastin e Ditës Ndërkombëtare të Gruas, duke theksuar rëndësinë e barazisë dhe drejtësisë për vajzat dhe gratë në Kosovë.
Ai ka thënë se çdo 8 Mars është thirrje për më shumë punë dhe angazhim drejt barazisë dhe drejtësisë për çdo vajzë dhe grua në vend.
Në një postim në Facebook me rastin e Ditës së Gruas 8 marsin, ai ka theksuar se historia e vendit është e mbushur me sakrifica që bartin mundin dhe angazhimin e vajzave dhe grave, të cilat, sipas tij, vunë themelet e lirisë duke flakur paragjykimet dhe duke u rreshtuar në frontin e përbashkët për liri.
Sveçla është shprehur se institucionet e mbrojtjes dhe sigurisë janë vijimësi e ushtrisë së vendit dhe se sot në liri gratë dhe vajzat janë faktor i rëndësishëm i paqes dhe stabilitetit të Republikës. Ai theksoi se në vitet e fundit gratë dhe vajzat e Policisë së Kosovës kanë qenë në krye të detyrës në mbrojtje të rendit, kushtetutshmërisë dhe ligjshmërisë në veri dhe në gjithë vendin.
“Duke njohur sfidat që ende rëndojnë mbi vajzat dhe gratë, institucionet rikonfirmojnë përkushtimin jo vetëm për rritjen e pjesëmarrjes së tyre në sferën publike, por edhe për garantimin e sigurisë për çdo vajzë dhe grua që përballet me vështirësi të sigurisë”, ka shkruar ai.
Në fund, Sveçla ka shprehur mirënjohje për kontributin e grave në çdo fushë të jetës shoqërore dhe riafirmoi angazhimin që barazia të mos mbetet vetëm aspiratë, por të bëhet realitet i përditshëm për çdo vajzë dhe grua në vend.























