Kushtetuesja: Mbyllja e Tik Tok cënoi lirinë e shprehjes,Rama e kundërshton
Medina Pasoma / RTKlive
Gjykata Kushtetuese e Shqipërisë ka publikuar vendimin në të cilën thuhet se mbyllja e rrjetit social ‘Tik Tok’ nga ana e qeverisë ka cënuar lirinë e shprehjes.
“Gjykata arriti në përfundimin se ndërprerja e aksesit në platformën TikTok përbën kufizim të lirisë së shprehjes dhe të shtypit”, thuhet në vendim.
Sipas Kushtetuese, vendimi për mbylljen e rrjetit social nuk mund të bëhej përmes një vendimi të Këshillit të Ministrave.
Në anën tjetër, ndaj këtij vendimi ka pasuar reagimi i kryeministrit shqiptar, Edi Rama, i cili tha se falë mbylljes së këtij rrjeti social u mundësuan ndryshime pozitive në mënyrë që të rilejohej përdorimi.
“Gjykata Kushtetuese mendoka që 90% e prindërve dhe mësuesve shqiptarë ishin gabim kur kërkuan mbylljen e TIKTOK-ut! Fatmirësisht ne e rihapëm TIKTOK-un falë mirëkuptimit që gjetëm tek kompania për masat extra që u morën prej saj, pikërisht falë mbylljes, se të ishte për Gjykatën Kushtetuese, s’do ishte mbyllur fare dhe as masat pozitive s’do kishin ardhur dot!”, ka shkruar ai në X.
























