Kurti takon komandantin e KFOR-it, diskutojnë për sigurinë në Kosovë
Blerim Halimi | RTKlive
Kryeministri Albin Kurti priti sot në takim komandantin e misionit të NATO-s në Kosovë - KFOR, gjeneralmajor Özkan Ulutaş.
Sipas njoftimit nga Kryeministria, komandanti Ulutaş e uroi kryeministrin Kurti për mandatin e ri qeverisës, teksa diskutuan për bashkëpunim të ngushtë mes misionit të NATO-s në Kosovë – KFOR dhe institucioneve të Republikës së Kosovës.
“Në takim u diskutua për situatën e sigurisë, në një kohë të zhvillimeve dhe ndryshimeve të mëdha në botë që mund të paraqesin sfida për sigurinë, me ç’rast kryeministri vlerësoi komunikimin e mirë dhe të vazhdueshëm. Kryeministri Kurti e falënderoi komandantin Ulutaş për kontributin dhe rolin e tij të rëndësishëm në udhëheqjen e KFOR-it dhe për bashkëpunimin me institucionet e Republikës së Kosovës”, thuhet në njoftim.























