Vritet i dyshuari që hapi zjarr ndaj agjentëve të Shërbimit Sekret
A.B|RTKLive
Një person i armatosur, i cili hapi zjarr ndaj një pike sigurie të Shtëpisë së Bardhë, u vra pas shkëmbimit të zjarrit me agjentët e Shërbimit Sekret të shtunën në mbrëmje, kanë konfirmuar zyrtarët.
Partneri mediatik amerikan i BBC-së, CBS, e identifikoi të dyshuarin si Nasire Best, 21 vjeç, i cili ishte i njohur për agjencinë dhe kishte histori të dokumentuar të problemeve të shëndetit mendor.
Të shtënat u dëgjuan pak pas orës 18:00 sipas kohës lokale (23:00 GMT) – gazetarët që po filmonin jashtë u përkulën dhe vrapuan për t’u strehuar brenda Shtëpisë së Bardhë.
Presidenti amerikan, Donald Trump, ndodhej në Shtëpinë e Bardhë, por nuk u lëndua. Ai falënderoi oficerët për “veprimin e shpejtë dhe profesional”. Të shtënat ndodhën një muaj pasi një person i armatosur hapi zjarr gjatë Darkës së Korrespondentëve të Shtëpisë së Bardhë.
Ngjarja nisi kur një burrë nxori armën nga çanta e tij dhe “filloi të qëllonte” pranë Shtëpisë së Bardhë, në kryqëzimin e Rrugës së 17-të dhe Pennsylvania Avenue NW në Uashington DC, afër Ndërtesës Ekzekutive Eisenhower.
Oficerët e Shërbimit Sekret të vendosur në qoshe iu kundërpërgjigjën me zjarr, duke e goditur personin e armatosur. Ai u dërgua më pas në spital, ku u shpall i vdekur.
Një kalimtar i rastit gjithashtu u plagos nga të shtënat, por Shërbimi Sekret nuk dha detaje të tjera për gjendjen e tij. Asnjë oficer nuk u lëndua në sulm.
Trump ishte në Shtëpinë e Bardhë në momentin e incidentit, por zyrtarët thanë se asnjë “person nën mbrojtje” dhe as operacionet nuk u prekën.























