Hoxha-Gjuriq në Washington, në fokus deklaratat e Paunoviqit
BKT
Lajme

Hoxha-Gjuriq në Washington, në fokus deklaratat e Paunoviqit

Sh. Çoçaj/RTKLive

Ministri i Jashtëm i Shqipërisë, Ferit Hoxha, ka bërë të ditur se është takuar me homologun e tij serb, Marko Gjuriq, në margjinat e një takimi ministror në Washington.

Sipas Hoxhës, gjatë takimit u diskutuan zhvillimet aktuale dhe perspektivat e bashkëpunimit, ndërsa ai tha se ia përcolli Gjuriqit qëndrimin e Shqipërisë lidhur me deklaratat e ministres serbe Snezhana Paunoviq për Kosovën.

"Po ashtu, ritheksova qëndrimin e qartë dhe të palëkundur të Shqipërisë lidhur me deklaratat e papranueshme dhe të papërgjegjshme të bëra së fundmi nga një anëtare e Qeverisë së Serbisë. Nënvizova nevojën për të refuzuar pa asnjë mëdyshje retorikën që nxit tensione, minon stabilitetin dhe bashkëpunimin rajonal, si dhe bie ndesh me frymën e marrëdhënieve të mira fqinjësore dhe vlerave europiane", deklaroi ai.

Ai shtoi se pikërisht ky është roli i diplomacisë.

"Të angazhohesh në dialog të hapur, të përballesh sy më sy, të përballosh realitetin dhe t'i trajtosh dallimet me përgjegjësi", theksoi ai.

Edhe ministri i Jashtëm i Serbisë, Marko Gjuriq, njoftoi për takimin përmes rrjetit social X, por në deklarimin e tij nuk përmendi çështjen e deklaratave të Paunoviqit.

"Angazhimi i vazhdueshëm në dialogun politik mbetet thelbësor për garantimin e stabilitetit dhe prosperitetit të rajonit, siç e theksova gjatë bisedës sime me ministrin e Jashtëm të Shqipërisë, Ferit Hoxha, në margjinat e Takimit Ministror në Uashington. Gjithashtu, identifikuam mundësi të tjera për të avancuar marrëdhëniet tona dypalëshe dhe për të forcuar bashkëpunimin në fusha me interes të ndërsjellë", shkroi ai.


MË SHUME NGA Lajme