Mbahet protesta e 68-të në Tiranë
BKT
Shqipëri

Mbahet protesta e 68-të në Tiranë

atsh

Në Tiranë u mbajt pasditen e sotme protesta e 68-të, ku qytetarë u mblodhën në sheshin “Skënderbej” kundër investimit turistik të planifikuar në Zvërnec dhe me kërkesa për ndryshime politike.

Protestuesit marshuan drejt Kryeministrisë përgjatë bulevardit “Dëshmorët e Kombit”, ndërsa në fokus të tubimit ishin kundërshtimi i projektit në Zvërnec dhe kërkesa për anulimin e tij.

Qytetarët kërkuan gjithashtu ndryshimin e ligjit zgjedhor, shfuqizimin e ligjit për investitorët strategjikë dhe të “Paketës së Maleve”, si dhe ndryshime lidhur me zonat e mbrojtura dhe trashëgiminë kulturore.

Protestuesit e mbledhur para Kryeministrisë deklaruan se do t’i vijonin tubimet, duke përsëritur kërkesën për dorëheqjen e kryeministrit Edi Rama dhe ndryshime në politikat qeverisëse.

Aktivisti Florian Myftari u bëri thirrje qytetarëve t’u bashkoheshin protestave, duke theksuar se ndryshimi i vendit duhej të vinte përmes angazhimit qytetar dhe votës së lirë.

“Sot Edi Rama kishte shpresuar se asnjë nga ne nuk do të ishte këtu dhe se do t’i shijonte pushimet i qetë. Por jo, ne kishim vendosur të mos largoheshim nga Bulevardi pa u larguar Edi Rama”, deklaroi Myftari.

Ai akuzoi politikën për mosmbajtje të premtimeve dhe kërkoi që qytetarët të merrnin pjesë në jetën publike për të përcaktuar, përmes votës së lirë, drejtimin e vendit.

Ndërsa aktivistja Sidorela Vatnikaj tha se pas 68 ditësh protestash qytetarët ishin bashkuar përtej ndarjeve politike dhe krahinore, duke kërkuar një Shqipëri më të lirë dhe më të drejtë.

Ajo renditi ndër kërkesat kryesore dorëheqjen e kryeministrit dhe kabinetit qeveritar, si dhe shfuqizimin e ligjit për investitorët dhe të ligjeve që, sipas saj, privatizonin të mirat publike.

“Kishim ardhur në këtë shesh çdo ditë sepse kërkesat tona nuk ishin realizuar dhe nuk do ta lëshonim sheshin pa u realizuar ato”, u shpreh Vatnikaj.

Protestuesit deklaruan se tubimet do të vijonin edhe në ditët në vijim, deri në realizimin e kërkesave të tyre.


MË SHUME NGA Shqipëri