Shkëndija mbyll aventurën evropiane, eliminohet nga Hibernian
F.Bytyqi/RTKLive
Shkëndija i ka dhënë fund aventurës së saj në garat evropiane, pasi nuk arriti ta përmbysë disavantazhin ndaj Hibernianit në ndeshjen e kthimit të Ligës së Konferencës.
Skuadra nga Tetova barazoi 0-0 në shtëpi, rezultat që nuk i mjaftoi për të avancuar më tej, pasi Hiberniani kishte fituar ndeshjen e parë dhe e mbylli përballjen me rezultat të përgjithshëm 2-1.
Shkëndija zhvilloi një ndeshje të mirë, sidomos në aspektin e organizimit dhe krijimit të rasteve, por mungesa e konkretizimit në fazën ofensive rezultoi vendimtare.
Ekipi tetovar regjistroi plot 15 goditje drejt portës kundërshtare, por asnjëra prej tyre nuk u shndërrua në gol. Pavarësisht presionit dhe tentimeve të vazhdueshme, Hiberniani arriti ta ruajë portën të paprekur dhe të mbrojë avantazhin e krijuar nga ndeshja e parë.
Në anën tjetër, Shkëndija tregoi edhe një paraqitje solide në fazën defensive, duke neutralizuar disa prej aksioneve të rrezikshme të skuadrës skoceze.
Hiberniani, i cili në raundin paraprak kishte eliminuar Malishevën, tashmë ka kaluar edhe pengesën e radhës shqiptare dhe vazhdon rrugëtimin në Ligën e Konferencës.
Për Shkëndijën, eliminimi nënkupton fundin e aventurës evropiane për këtë sezon. Skuadra tetovare tashmë do ta zhvendosë fokusin te kampionati vendor, ku synimi kryesor mbetet lufta për titull dhe rikthimi në garat evropiane sezonin e ardhshëm.























