Policia shënon 27-vjetorin me aktivitete sportive, Gjilani kampion në futsall
M.Sh/RTKlive
Me rastin e 27-vjetorit të themelimit të Policisë së Kosovës, kanë vazhduar aktivitetet sportive dhe rekreative të organizuara për zyrtarët policorë.
Aktivitetet kanë nisur më 1 shtator, ndërsa deri më tani janë zhvilluar gara në shah, shenjëtari dhe volejboll, me pjesëmarrjen e ekipeve dhe individëve nga drejtoritë, divizionet dhe departamentet e Policisë së Kosovës.
Sot, në Obiliq, janë zhvilluar garat në futsal, ku kanë marrë pjesë 16 ekipe me zyrtarë nga njësi të ndryshme policore. Garat u zhvilluan në frymë sportive dhe miqësore, pavarësisht rivalitetit mes ekipeve.
Kampion i garës në futsal është shpallur ekipi i Drejtorisë Rajonale të Policisë në Gjilan, ndërsa vendin e dytë e ka zënë ekipi i Aeroportit, në kuadër të Departamentit të Kufirit.
Në aktivitetet e sotme ka marrë pjesë edhe drejtori i Përgjithshëm i Policisë së Kosovës, kolonel Gazmend Hoxha.
Në përfundim të garave, Hoxha ka ndarë kupa, medalje dhe mirënjohje për ekipet triumfuese, lojtarët më të dalluar, referët, ekipet e shërbimeve mjekësore dhe organizatorët.
Aktivitetet sportive për shënimin e 27-vjetorit të themelimit të Policisë së Kosovës do të vazhdojnë edhe në ditët në vijim.























