Kërkohet mos degradimi i parkut te varrezat e dëshmorëve
Banorët e lagjeve përreth parkut te Varrezat e Dëshmorëve në ‘Velani’ të Prishtinës kanë protestuar sot kundër degradimit të këtij parku dhe kanë kërkuar që kjo hapësirë të mos shndërrohet në varreza.
Me rastin e Ditës së Tokës, fëmijët e lagjeve përreth Parkut te Varrezat e Dëshmorëve në shenjë proteste kanë mbjellë një fidan dhe kanë kërkuar që parku të mos mbushet me varreza, por të jetë një hapësirë që iu dedikohet tërësisht atyre.
Leon Biçaku, një nga fëmijët që kishte dalë për të kërkuar që parku të mos degradohet, thotë se në këtë hapësirë duhet ndërtuar fusha sportive dhe krijuar hapësira gjelbëruese.

Leoni ka thënë se përkundër që janë të pakënaqur me gjendjen e parkut vazhdojnë ta shfrytëzojnë pasi është e vetmja hapësirë e gjelbër që ndodhet pranë vendbanimit të tyre.

Ndërkaq, Liridon Llapashtica, në emër të banorëve, ka thënë se e kanë mbjellë një fidan me shpresën se do të ndalet degradimi i parkut.

Në anën tjetër, banori Fadil Cakolli ka treguar se dy djemtë e tij kanë frikë të dalin për të luajtur, duke thënë se varrezat nuk e kanë vendin në park ku luajnë fëmijët.
Ndryshe, banorët e lagjeve përreth parkut te Varrezat e Dëshmorëve në ‘Velani’ të Prishtinës edhe më herët kanë mbajtur protesta duke kërkuar që parku të mos degradohet dhe të mos shndërrohet në varreza.























