Limaj: Interesat e Kosovës nuk mbrohen nga një individ
Kryetari i Nismës Socialdemokrate, Fatmir Limaj ka thënë se kjo parti është forca vendimtare në skenën politike të Kosovës, derisa ka shtuar se për shtatë vjet përfaqësuesit e institucioneve të Kosovës kanë dialoguar me Serbinë me duar në xhepa.
Në shënimin e 5 vjetorit të themelimit të Nismës në Gjakovë, Fatmir Limaj tha se janë humbur tetë vjet duke biseduar me Serbinë dhe hapur çështje të rëndësishme për Kosovën.
Ai tha e Nisma e ka ngritur zërin kundër krimeve që i mohon Serbia, e që të tjerët pak kanë folur për këtë temë, ndërkohë që sot po e përmendin pothuajse të gjithë.
Limaj tha se Nisma është ajo që më fund nxjerri rezolutën për dënimin e gjenocidit dhe krimeve në Kosovë.
Në këtë tubim me bashkpartiakë dhe simpatizantë të Nismës Socialdemokrate, zëvendëskryeministri i Kosovës, tha se në Kosovë veç aeroporti nuk është i privatizuar.
Limaj tha se në pesë vitet e fundit në skenën politike të Kosovës nuk ka ndodhur asnjë gjë e rëndësishme pa idetë, rolin, angazhimin dhe energjitë e Nismës Socialdemokrate.
Ai tha se Nisma, prej themelimit ishte e vendosur të marrë vendime politike pa zhurmë, që sipas tij, janë dhjetëra ide të dhëna nga Nisma që pastaj janë bërë politikë shtetërore të vendit.
Në 5 vjetorin e themelimit të Nismës në Gjakovë, Limaj kërkoi nga bashkëpartiakët e tij mbështetje dhe punë, ndërkohë u zotua para tyre që rezultatet nuk do të mungojnë.
Ndërsa, Fazli Hoxha kryetar i degës në Gjakovë tha se Nisma do të jetë adresë e mbrojtjes së kërkesave dhe interesave të qytetarëve të Gjakovës.
Ai tha se angazhimi i Nismës në bashkëqeverisje në Gjakovë ka dhënë kontributin e saj për një mirëqenie më të mirë për qytetarët.
Në këtë tubim, Limaj i tha kryetarit të degës se në zgjedhjet e ardhshme beson që Gjakova do ta zgjedh deputet të Parlamentit të Kosovës, dhe për këtë tha se do ta ketë mbështetjen e fuqishme të tij dhe të partisë.
Në shënimin e 5 vjetorin të Nismës në Gjakovë, Nismës Socialdemokrate iu bashkuan edhe disa të rinj.























