Betejat e Dullës kundër dukurive negative, e kërkon mbështetjen e Tërrnavës
Shefi i Task forcës kundër narkotikëve dhe sigurisë në shkolla Avdullah Hasani ka takuar Myftiun e Kosovës, Naim Tërnavën.
Hasani ka shkruar në Facebook, se mëngjesin e sotëm e ka filluar duke pirë kafe me Naim Tërnavën.
Hasani i ka kërkuar ndihmën Tërnavës në luftën e Task forcës që udhëhiqet nga ai kundër përdorimit të narkotikëve.
“Myftiut Tërnava i kërkova ndihmë që në luftën tonë kundër dukurive negative përkatsisht, kundër përdorimit të narkotikëve përmes fushatës shtetërore t’i bashkëngjitet edhe BIK-u”.
Hasani ka thënë se Bashkësia Islame e Kosovës përmes ligjëratave të saja të vetëdijësojë të rinjtë kundër përdorimit të drogës.
“Është e rëndësisë së veçantë që Bashkësia Islame e Kosovës përmes ligjëratave të saja të ngrisë vetëdijësimin tek të rinjtë për dëmët dhe efektet negative që ka përdorimi i substancave narkotike”.
Myftiu Tërnava i shprehu gatishmërinë që Bashkësia Islame t’i ofrojë Task-Forcës në gjithë veprimtarinë e saj asistencën e kërkuar fetare. Pas takimit dhe pas konsultimit me kryeimamin Sabri ef. Bajgora, Myftiu mori vendim që të premten tjetër, në të gjitha xhamitë e Kosovës, në hytbenë e xhumasë, të jepet mesazhi i njësuar kundër përdorimit të narkotikëve dhe në mbështetje të veprimtarisë së Task-Forcës së Qeverisë të themeluar për këtë qëllim.























