Ngritet niveli i bashkëpunimit institucional për ditën e zgjedhjeve
BKT
Lajme

Ngritet niveli i bashkëpunimit institucional për ditën e zgjedhjeve

Është ngritur niveli i bashkëpunimit institucional të cilat janë nënshkruese të memorandumit të bashkëpunimit për procesin zgjedhor, për parandalimin e shkeljeve ligjore dhe hetimin dhe ndjekjen e të gjitha rasteve që bien ndesh me ligjin.

Kështu u bë e ditur në konferencën e përbashkët me përfaqësues të institucioneve nënshkruese si Komisionit Qendror të Zgjedhjeve, Panelit Zgjedhor për Ankesa dhe Parashtresa, Prokurorit të Shtetit, Këshillit Gjyqësor të Kosovës, Policisë së Kosovës, dhe përfaqësuesve nga Demokracia në Veprim.

Aty u tha se është certifikuar edhe lista përfundimtare e votuesve e cila përmban 1 milionë e 937 mijë e 869 votues, apo 111 mijë e 733 votues më pak se në zgjedhjet e 22 tetorit të vitit 2017.

Drejtori i Departamentit për çështje ligjore në KQZ, Xhemail Peçani tha se deri më tani kanë pasur sfida për shkak të afateve të jashtëzakonshme, porse shtoi se janë brenda afateve të parashikuara me planin operacional.

Ai tha se në zgjedhjet e 6 tetorit do të jenë 895 qendra të votimit, apo katër qendra më pak se në zgjedhjet e vitit 2017.

Laura Pula, koordinatore nacionale për zgjedhje në Prokurorinë e Shtetit, tha se shpresojnë që dita e zgjedhjeve të jetë ditë feste për të gjithë.

Në zyrën e Prokurorit të Shtetit, Pula tha se tashmë kanë caktuar dhomën operative me staf të mjaftueshëm, i cili do të jetë ‘online’ me të gjitha qendrat, prokuroritë dhe koordinatorët.

Ajo bëri të ditur se kanë filluar edhe hetimet e publikimit të video-s jashtë shtetit, në të cilën shihet votimi në një familje, për çka tha se vet protagonisti i asaj video është lajmëruar dhe se ka deklaruar se në videon në fjalë janë fotografuar vetëm zarfet dhe jo fletët e votimit.

Nga Këshilli Gjyqësor i Kosovës, zëvendëskryesuesja Makifete Saliuka u shpreh se përkrahin zgjedhjet e parakohshme në vend me të gjitha kapacitetet që kanë.

Gyltene Sylejmani, kryesuese e Panelit Zgjedhor për Ankesa dhe Parashtresa bëri të ditur se deri më tash janë parashtruar 210 ankesa dhe panele.

Ajo tha se deri në këtë fazë në PZAP janë parashtruar 86 apele dhe 124 ankesa, teksa bëri të ditur edhe për gjobat e shqiptuara ndaj subjekteve politike.

Ndërsa Florent Spahija nga Demokracia ne Veprim tha se kanë të angazhuar 72 vëzhgues në periudhë afatgjatë, ndërsa në ditën e zgjedhjeve do të jenë edhe 2 mijë e 600 vëzhgues, të cilët do të jenë në secilin vendvotim.


MË SHUME NGA Lajme