“Dardanët” nisin përgatitjet për Malin e Zi
Vetëm një ditë pas fitores minimale 1-0 ndaj Gjibraltarit në miqësore, Përfaqësuesja e Kosovës ka nisur nga puna për të përgatitur ndeshjen eliminatore të Euro 2020-ës ndaj Malit të Zi, e planifikuar për më 14 tetor në stadiumin “Fadil Vokrri” të Prishtinës.
Nën urdhrat e trajnerit Bernard Challandes kanë qenë vetëm 18 futbollistë sot, pasi Ujkani, Dresevic dhe Nuhiu, të cilët luajtën për 90 minuta ndaj Gjibraltarit, janë lënë pushim, ndërsa Arbenit Xhemajli dhe Lirim Kastrati janë lënë të lirë ti bashkohen Kosovës U21 për ndeshjen ndaj Shqipërisë, më 15 tetor në “Elbasan Arena”.
Këta të fundit ishin risi në listën e trajnerit zviceran për këtë grumbullim dhe mbrojtësi luajti për 90 minuta në fushë, duke treguar siguri dhe saktësi, ndërsa sulmuesi i Lokomotivës së Zagrebit shfaqi dëshirë të madhe, por pa arritur të nxjerrë në pah aftësitë e tij më të mira.
Në seancën e sotme, janë stërvitur plotësisht me grupin edhe futbollistë si Milot Rashica, Herolind Shala dhe Vedat Muriqi, të cilët kishin ardhur me probleme fizike nga klubet e tyre dhe ishin stërvitur veçmas në ditët e para të grumbullimit.
Kosova do të përballet me Malin e Zi të hënën në orën 20:45 në stadiumin “Fadil Vokrri”, në një sfidë ku për “Dardanët” vlen vetëm marrja e 3 pikëve, për të mbajtur gjallë shpresat për një vend në kampionatin Europian të 2020-ës.























