Sonte në RTK 1, Kosova - Mali i Zi
BKT
Sport

Sonte në RTK 1, Kosova - Mali i Zi

Kosova është gati për një tjetër ndeshje të madhe në kuadër të kualifikueseve të Euro 2020, të cilën dëshiron ta fitojë me çdo kusht për të qenë e pranishme për herë të parë në një event të madh të futbollit.

Sonte në orën 20:45, në stadiumin “Fadil Vokrri”, “Dardanët” do të përballen me fqinjët e Malit të Zi, me synimin e vetëm fitoren, për t’i mbajtur të larta mundësitë për kualifikim, ndeshje kjo e cila do të transmetohet drejtpërdrejt në RTK1. 

Fitorja 2-1 e Çekisë kundër Anglisë pak ditë më parë ishte rezultati më i padëshiruar për Kosovën, pasi “Dardanët” duhet të rikuperojnë tashmë 4 pikë ndaj çekëve për vendin e dytë. Edhe pse gjasat për kualifikim tashmë janë vështirësuar, te “Dardanët” ka entuziazëm dhe dëshirë të jashtëzakonshme për ta bërë realitet një ëndërr të madhe të futbollit kosovar.

Në takimin e parë të zhvilluar në Podgoricë, Kosova barazoi 1-1 me gol të Milot Rashicës që në minutën e 24-t (u barazua nga Mugosa 69’), por ç’është e vërteta skuadra Challandes ishte dominuese në lojë dhe meritonte fitoren në atë duel.

Që nga ndeshja në Podgoricë ndaj Kosovës, Mali i Zi nuk ka shënuar gol në asnjë ndeshje zyrtare, ndërsa realizoi vetëm një herë në miqësoren ndaj Hungarisë.

Mungesën e golit në kampin e ekipit kundërshtar e kanë arsyetuar me punën që po bëhet në ndërrimin e gjeneratës dhe se po ngritët një ekip i ri.

Atmosfera në kampin e “Dardanëve” para kësaj ndeshje është shumë e mirë dhe të gjithë janë optimistë për fitore, me të cilën vazhdon ëndrra e kualifikimit në Evropian.