Bulliqi kërkon të mos ndërtohen stane tjera në vijë kufitare me Malin e Zi

Bulliqi kërkon të mos ndërtohen stane tjera në vijë kufitare me Malin e Zi

Kryetari i Komisionit Shtetëror për Shënimin dhe Mirëmbajtjen e Kufirit, Shpejtim Bulliqi, ka kërkuar që të ndalohen aktivitetet për ndërtimin e staneve të reja nga ana e qytetarëve të Kosovës në atë pjesë.

“Komisioni Shtetëror për Shënimin dhe Mirëmbajtjen e Kufirit këto ditë, ka vizituar zonën kufitare Kosovë – Mali i Zi, në pjesën e Ishtedimit dhe ka parë nga afër zhvillimet në terren”, ka shkruar Bulliqi në faqen e tij në Facebook.

“Duke analizuar zhvillimet dhe vijën kufitare, Komisoni apelon që të mos ndërmerren aktivitete për ndërtim të staneve të reja nga ana e qytetarëve të Kosovës në atë pjesë, dhe njëkohësisht të ndërpriten edhe aktivitetet për rrënimin e të njëjtave nga autoritetet e Malit të Zi, ngase bëhet fjalë për zonë kufitare dhe të drejtat sendore ndërkufitare do të definohen me Marrëveshjen Ndërshtetërore për Kufi”.

Tutje ai ka kërkuar përmbajtje nga rastet sikur ai i Ishtedimit ku disa persona kishin ndërtuar stane pa leje, të cilat më vonë shteti i Malit të Zi i rrëzoi.

“Ndryshimi i gjendjes faktike në terren, nuk i kontribuon punës së Komisionit në përgjithësi, e Trupës punuese në veçanti, andaj është tepër e nevojshme përmbajtja nga veprimet e njëanshme jo vetëm në Ishtedim, por në të gjithë brezin kufitar në përgjithësi”, ka shtuar Bulliqi i cili ka qenë kundërshtar i ashpër i demarkacionit ku Kosova do të humbiste 8 mijë hektarë tokë.