Aksion policor në veri të Kosovës
Policia e Kosovës është duke zhvilluar një operacion në veri të Mitrovicës, me urdhër të Prokurorisë Speciale të Republikës së Kosovës, bënë të ditur zyrtarë të Prokurorisë së Kosovës.
Ekrem Lutfiu, zëdhënës i Prokurorisë së Shtetit, tha për Radion Evropa e Lirë se aksioni është vazhdim i një aksioni të mëparshëm për arrestimin e tre të dyshuarve për veprat penale: krim i organizuar dhe keqpërdorim i pozitës zyrtare.
Më 18 tetor, Policia e Kosovës ka zhvilluar një operacion në veri të Mitrovicës, ku ka arrestuar dy persona, në lidhje me vrasjen e politikanit serb, Oliver Ivanoviq.
Oliver Ivanoviq është vrarë më 16 janar të vitit 2018 në Mitrovicën e Veriut para selisë së partisë së tij.
Ai ka qenë kryetar i Iniciativës qytetare “Liria, Demokracia dhe Drejtësia”.























