Me muzikë nis `Java Japoneze` në Kosovë
BKT
Kulturë

Me muzikë nis `Java Japoneze` në Kosovë

Ky vit shënon një përvjetor të veçantë, 10-vjetorin e vendosjes së marrëdhënieve diplomatike midis Japonisë e Kosovës.

Me këtë rast Ambasada e Japonisë në Austri dhe Fondacioni Japonez me mbështetjen e Japan Tobacco International (JTI) kanë organizuar ngjarjen pesëditore të kulturës japoneze “Java Japoneze”, e cila do të mbahet në ambientet e kinemasë “Armata”, në Prishtinë, nga 6 deri e deri më 10 nëntor, shkruan sot gazeta "Zëri".

Dje më 6 nëntor u mbajt një koncert muzikor, i cili do të vazhdojë dhe sot më 7 nëntor me muzikë japoneze nga Sumie Kaneko, performuese e instrumenteve japoneze koto dhe shamisen me qendër në Nju-Jork dhe Takuya Taniguchi, baterist Taiko me qendër në Munih. Të dy muzikantët janë jo vetëm mjeshtër të instrumenteve të tyre tradicionale japoneze, por gjithashtu pionierë në përdorimin e tyre në muzikën bashkëkohoro-eksperimentale. Për herë të parë në Kosovë audienca do ta ketë mundësinë të shijojë tingullin e fuqishëm të baterive të lashta japoneze së bashku me instrumentet tradicionale me tela shamisen dhe koton.

Përveç koncertit, katër filma japonezë të publikuar në Japoni në vitet 2017 – 2018 do të shfaqen çdo natë gjatë evenimentit në kinemanë “Armata”. Të gjithë filmat janë në versionin origjinal me titra në gjuhën angleze dhe hyrja është falas. Zëri


MË SHUME NGA Kulturë