Në dhjetor pritet përgjigje nga qeveria gjermane lidhur me patentë shoferë
Emigrantët nga Shqipëria dhe Kosova në Gjermani ende presin njohjen e lejes së drejtimit të automjeteve. E një proces i tillë mund të marrë disa vjet kohë. Por derisa se ajo të ndodhë, po shihet mundësia që shqiptarët në Gjermani të paktën të kalojnë testet në gjuhën shqipe.
Ambasadori i Kosovës në Berlin, Beqë Cufaj tashmë ka ftesë zyrtare që më 4 dhjetor të jetë në Ministrinë e Transporteve në Gjermani për të marrë një përgjigje për këto dy kërkesa.
Megjithatë, ai thotë në një intervistë për KosovaPress, se nuk di ende cila do të jetë përgjigja, duke kujtuar që një proces i tillë Maqedonisë së Veriut i ka kushtuar pesë vjet, ndërkohë Kosova ka vetëm një vit prej se ka aplikuar.
Në shtator të vitit të kaluar, Republika e Kosovës e kishte dorëzua formularin e plotësor të aplikimit për njohje të patentë shoferëve në Gjermani.
Marrë parasysh që një proces i tillë për Maqedoninë e Veriut ka zgjatur pesë vjet, edhe për Shqipërinë dhe Kosovën mund të marrë kohë të gjatë.
Andaj, ambasadori i Shqipërisë dhe ai i Kosovës patën ndërmarrë një tjetër nismë duke i kërkuar qeverisë gjermane që të paktën gjuha shqipe të jetë një prej gjuhëve të provimit.
Tani një kërkesë e tillë ka arritur në tryezën e specialistëve dhe më 4 dhjetor, ambasadori i Kosovës, thotë se do të marrin një përgjigje.
Ai thotë se nuk ka asnjë informacion se cila do të jetë përgjigja, veçse thekson se ky proces teknik është i lidhur me infrastrukturën ligjore, numrin e aksidenteve në vendin aplikues.
Pas gjashtë muajsh qëndrimi në Gjermani, leja ndërkombëtare e drejtimit të automjetit, e të huajve përfundon dhe emigrantët duhet t’i nënshtrohen sërish provimit, praktikë dhe teori, në mënyrë që të marrin një leje drejtimi gjermane.























