Grenell kërkon nga Serbia të ndalojë fushatën lobuese kundër Kosovës
BKT
Lajme

Grenell kërkon nga Serbia të ndalojë fushatën lobuese kundër Kosovës

I dërguari i posaçëm i Presidentit amerikan Donald Trump, për dialogun Kosovë-Serbi, Richard Grenell, pas takimit që e ka pasur me kryetarin e LDK-së, Isa Mustafa deklaroi edhe një herë se ata nuk janë të interesuar të ndërhyjnë në formimin e qeverisë, por janë të interesuar të shtyjnë përpara zhvillimin ekonomik në Kosovë.

(E plotësuar) Grenell edhe nga selia e LDK-së, para gazetarëve kërkoi largimin e taksës 100 përqind ndaj Serbisë, por theksoi se edhe kjo e fundit duhet të ndërpret fushatën e dëmshme lobuese karshi Kosovës.

“E përçova të njëjtin mesazh që ne në Amerikë nuk jemi të interesuar në përfshirje në atë sesi do të formohet qeveria, dhe ajo se çfarë jemi të interesuar është zhvillimi ekonomik. E ndava vizionin tim për arritjen e shpejt të qëllimit, ku do e heqim taksën dhe Serbia të ndal fushatën e saj për mosnjohjen e Kosovës. Mendoj se këto të dyja janë hapat e ardhshëm. I shkëmbyem disa ide ekonomike sesi të ecim përpara dhe të krijojmë më shumë energji  dhe entuziazëm për vende të punës. Ne biseduam më specifikash për projektet që po vijnë, mendoj se do i kemi disa njoftime në të ardhmen e afërt për më shumë progres kur flitet për vende të punës”, u shpreh Grenell.

Diplomati amerikan tha se në Kosovë dëshirojnë të sjellin energji dhe ide pozitive që përqendrohen në krijimin e vendeve të reja të punës.

“Ne dëshirojmë të sjellim disa nga këto ide dhe energji këtu në këtë regjion dhe mendoj që fillon me ndërprerjen e luftës politike dhe të përqendrohen në atë se çfarë janë gjërat që mund të bëhen nga këndvështrimi ekonomik për të krijuar vende të reja të punës, biznese të reja këtu në Kosovë dhe Serbi dhe në tërë rajonin dhe si të krijojmë vende pune me paga më të mira, ky do të jetë fokusi ynë”, tha ai.

Ambasadori Grenell më herët gjatë ditës takoi edhe mandatarin për kryeministër, Albin Kurti, kurse dje është takuar me presidentin, Hashim Thaçi.

Grenell nesër pritët të shkojë në Serbi për t’u takuar me presidentin, Aleksandër Vuçiq.

Grenell kërkon nga Serbia të ndalojë fushatën lobuese kundër Kosovës

 

Grenell: Nuk përfshihem në çështjen e formimit të qeverisë

Përfaqësuesi special i presidentit të Shteteve të Bashkuara të Amerikës për dialogun Kosovë-Serbi, ambasadori Richard Grenell, pasi takoi mandatarin për formimin e Qeverisë së re të Kosovës, Albin Kurtin, tha se taksa 100% ndaj Serbisë duhet të hiqet dhe kjo e fundit duhet të ndërpresë fushatën kundër pavarësisë së Kosovës.

Ndërkohë, shtoi se nuk është i interesuar të përfshihet në çështjen e formimit të qeverisë, veçse theksoi se i ka thënë Kurtit që edhe shtete të tjera kanë pasur probleme rreth krijimit të koalicioneve të panatyrshme.

Ambasadori Grenell, që po qëndron për vizitë në Kosovë, tha para gazetarëve se po provon të injorojë atë që ai e quajti “beteje politike” në Kosovë dhe po përqendrohet në zhvillimin ekonomik.

Sipas tij, për të ecur tutje drejt zhvillimit ekonomik duhet të hiqet taksa 100% ndaj Serbisë, e vendosur nga Qeveria e Kosovës në fund të vitit 2018. 

“Po provoj të injoroj betejën politike dhe të përqendrohem në zhvillimin ekonomik. Për shkak të kësaj,  i kërkova z. Kurti dhe do i kërkoj çdo udhëheqësi politik këtu që është shumë e rëndësishme se nëse dëshirojmë të ecim përpara, nevojitet zhvillimi ekonomik  dhe taksa 100% të hiqet, është diçka që duhet të hiqet, po ashtu edhe fushata e Serbisë  duhet gjithashtu të ndalet. Unë mendoj se që të dyja duhet të ndodhin në mënyrë që bizneset të rriten, të krijohen vende të punës për të rinjtë. Unë do ta përçoj  të njëjtin mesazh edhe në Beograd . Dëshiroj që ne të ecim përpara dhe të ndihmojmë familjet e reja dhe të rinjtë që të kenë punë me paga më të mira dhe një situatë me ekonomi në rritje. Ky ishte mesazhi im që e përçova  këtu dhe do jetë mesazhi i njëjtë që do e përçoj në Serbi”, tha Grenell.

Ambasadori amerikan në Berlin tha se çështjen e formimit të qeverisë e shikon vetëm prej anash meqë nuk është i interesuar të përfshihet në diçka të tillë.

“Çështja  e formimit të qeverisë nuk është çështje e imja dhe nuk jam i interesuar të  përfshihem, gjithçka që po shikojmë nga anash. Do i them dy gjëra, i thash z. Kurti  se shtetet si Britania e Madhe dhe Gjermania  kanë pasur probleme për krijimin e koalicioneve të panatyrshme për të formuar qeverinë, ju thash se ne po shikojmë dhe se ne nuk kemi ‘ndonjë qen në këtë betejë’  dhe vetëm po shikojmë se çfarë po ndodh dhe i inkurajojmë të ndjekin sundimin e ligjit si çdokush tjetër, dhe ta dinë që edhe shtetet e tjera kanë pasur problem  për krijimin e koalicioneve të panatyrshme”, tha Grenell.

Ambasadori Grenell, pas takimit me kryetarin e Vetëvendosje, Albin Kurtin në selinë e Lëvizjes, tha se zhvillimi ekonomik është gjëja më e rëndësishme dhe përpjekja për krijimin  e vendeve të punës dhe për sjelljen e bizneseve evropiane e amerikane në Kosovë.

Ai tha se njerëzit janë të uritur për të vepruar dhe të ndihmojnë në rritjen ekonomike.

Grenell ka arritur në Kosovë dje, ku fillimisht është takuar me presidentin e Kosovës, Hashim Thaçi, ndërsa sot ka takuar Albin Kurtin dhe Isa Mustafën.


MË SHUME NGA Lajme