Zhbllokohet rruga Mitrovicë-Stantërg, protesta vazhdon para minierës
BKT
Lajme

Zhbllokohet rruga Mitrovicë-Stantërg, protesta vazhdon para minierës

Në shenjë pakënaqësie me procesin e fundit të punësimit në ndërmarrjen Trepça, dhjetëra protestues, në ditën e katërt të protestës së tyre, kanë bllokuar sot në mëngjes rreth 40 minuta rrugën Mitrovicë-Stantërg.

Ata rreth orës 6:30, tek Tuneli i Parë, fillimisht kanë lënë disa automjete në rrugë, pastaj i kanë larguar ato dhe kanë vazhduar të qëndrojnë në rrugë, duke paralizuar kështu lëvizjen e plotë nga Mitrovica në drejtim të Stantërgut dhe anasjelltas

Njëkohësisht, në këtë mënyrë është pamundësuar edhe shkuarja në punë e shumë minatorëve nga Mitrovica në minierën e Stantërgut dhe në flotacion, ndërsa protestuesit më vonë kanë liruar qarkullimin e automjeteve të vogla, por jo edhe të autobusëve me punëtorë.

Herë herë ka pasur tensione në rastet kur protestuesit identifikonin pumëtorët të cilët ishin duke udhëtuar me automjetet e tyre, të cilat i kthenin mbrapsht.

Arsim Musa, nga këshilli protestues, ka bërë të ditur për KosovaPress, se qëllimi i bllokimit të rrugës ka qenë mos lejimi i shkuarjes në punë të atyre punëtorëve të cilët nuk i kanë mbështetur këto protesta.

Sipas tij, përkundër thirrjes së protestuesve për takim me kryeministrin ose ministrin e Zhvillimit Ekonomik, ata akoma nuk kanë marrë ndonjë përgjigje.

Ndërkaq, Ahmet Xhosha, komandanti i stacionit policor në Mitrovicë, tha se është arritur që me mirëkuptim dhe në mënyrë profesionale të komunikohet me protestuesit për t’i bindur ata që ta zhbllokojnë rrugën.

Falë kësaj, shtoi ai, nuk është shënuar ndonjë incident gjatë kësaj proteste.

Pas zhbllokimit të rrugës, protestuesit po vazhdojnë protestën e tyre para hyrjes së minierës në Stantërg.


MË SHUME NGA Lajme