`BESA` nga Bavaria nis mbledhjen e fondeve për familjet e prekura nga COVID
Rrjeti i pare i Bizneseve shqipetare Fondacioni “BESA” nga Bavaria, Klubi i Prodhuesve të Kosovës, Organizata GERMIN, së bashku me Fondacionin Global Shqiptar, organizojnë fushatën për mbledhjen e fondeve për t’iu ardhur në ndihmë familjeve në nevojë në Kosovë, të prekura nga COVID-19.
Ilir Seferi nga Fondacioni “BESA” nga Bavaria e Gjermanisë, tha se me këto fonde do tu mundësohet dhurimi i nga një pako me ushqime dhe produkte bazë të higjienës. Kjo fushatë ka për qëllim edhe mbështetjen e prodhuesve vendorë, duke qenë se të gjitha produktet e pakove të ndihmave do të jenë MADE IN KOSOVA.
"Nga kjo fushatë do të ndihmohen familjet në nevojë nëpër komunat e Kosovës të cilat janë të karantinuara dhe në gjendje të rëndë financiare për shkak të pandemisë COVID-19. Nëse jeni në gjendje të kontribuoni në këtë fushatë, këtë mund ta bëni duke dhuruar nga sot e tutje. Çfarëdo shumë që ju dhuroni nuk është shumë e vogël. Çdo cent vlenë! Kosto e pakos për një familje është 26,00 Euro. Distribuimi i pakove do të bëhet deri te pragu i secilës familje", tha ai sot në emisionin e mëngjesit `Mirëmëngjesi Kosovë`, në Radio Televizionin e Kosovës (RTK).
Sipas tij deri tani kanë bërë një test të shpërndarkes në Kosovë. "Kemi shpërndarë në Skenderaj dhe kemi vendosur vetëm të shpërndajë produkte vendore", tha ai.























