Osmani: Kuvendi do të mbështesë çdo nismë për hetime të pavarura
Kryetarja e Kuvendit të Kosovës, Vjosa Osmani, me rastin e vdekjes tragjike të 26-vjeçarit Agon Musliu nga Gjilani, ka dërguar një telegram ngushëllimi familjes së të ndjerit, i cili në rrethana ende të panjohura kërceu dje nga kati i katërt i Qendrës së Studentëve në Prishtinë.
“Lajmin për humbjen e jetës së më të dashurit tuaj, Agonit, e kam pranuar me dhimbje të madhe. Prandaj, më lejoni që si qytetare e këtij vendi, si nënë dhe udhëheqëse e Kuvendit të Kosovës, ta ndaj me ju dhimbjen e thellë për vdekjen e parakohshme të tij”, thuhet në telegram.
Osmani ka thënë se vdekja e Agon Musliut është ngjarje e trishtuar në kohën me pandemi dhe shpreson se organet e drejtësisë do të punojnë në zbardhjen e shpejtë të rrethanave të kësaj vdekjeje tragjike.
“Si Kuvend i Kosovës ne do të mbështesim ҫdo nismë për hetim të pavarur e profesional, i cili do ta zbardhte përfundimisht gjithfarë që ka ndodhur me familjarin tuaj pas kthimit të tij në atdhe”, ka thënë Osmani.
Telegrami i ngushëllimit i kryetares së Kuvendit, Vjosa Osmani, dërguar familjes Musliu:
E dashur familje Musliu,
Lajmin për humbjen e jetës së më të dashurit tuaj, Agonit, e ka pranuar me dhimbje të madhe. Prandaj, më lejoni që si qytetare e këtij vendi, si nënë dhe udhëheqëse e Kuvendit të Kosovës, ta ndaj me ju dhimbjen e thellë për vdekjen e parakohshme të tij.
Vdekja e Agonit, në lulen e rinisë, është ngjarje e trishtë, e cila I ka prekur zemra e cdo qytetari të vendit dhe e ka pllakosur Kosovën në zi. Ajo ndodh në një kohë të rëndë për të gjithë ne, në rrethana të pasqaruara plotësisht. Unë shpresoj se organet e drejtësisë do të punojnë në zbardhjen e shpejtë të rrethanave të kësaj vdekjeje tragjike.
Si Kuvend i Kosovës ne do të mbështesim ҫdo nismë për hetim të pavarur e profesional, i cili do ta zbardhte përfundimisht gjithë ҫfarë ka ndodhur me familjarin tuaj pas kthimit të tij në atdhe.
Dr. Vjosa Osmani, kryetare e Kuvendit























