Interi jep 30 milionë euro për dy futbollistë të Chelseat
Sharr Travel

Interi jep 30 milionë euro për dy futbollistë të Chelseat

Interi vijon të këmbëngulë për të marrë në Milano anësorin italo-brazilian Emerson Palmeiri, ndërsa sipas mediave italiane, drejtuesit e klubit zikaltër kanë bërë një tjetër hap përpara, duke prezantuar një tjetër ofertë para drejtuesve homologë londinezë.

Te Chelsea pretendojnë 30 milionë për kartonin e Emerson, ndryshe nga 20+5 që pati ofruar Interi më herët, ndërsa mësohet se orët e fundit Marotta e Ausilio kanë shprehur gatishmërinë për të paguar 30 milionë euro, me kushtin që të marrin në huazim një vjeçar sulmuesin francez Olivier Giroud.

Ideja e drejtuesve zikaltër është që me 30 milionë euro të blejnë përfundimisht kartonin e Emerson Palmeirit dhe të marrin në huazim me të drejtë blerjeje sulmuesin kampion bote, i cili nuk ka gjetur shumë hapësira në formacionin e Franck Lampard.

Marrëdhëniet mes dy klubeve janë shumë të mira, pasi kohët e fundit janë ulur shpesh në bisedime për emra të ndryshëm dhe për më tepër, si Giroud ashtu edhe Emerson nuk bëjnë pjesë në projektin e trajnerit të Chelseat, ndaj londinezët duan të lirohen prej tyre.

Nga ana tjetër zikaltrit do të kompletonin krahun e majtë me Emerson dhe Ashley Young, por njëkohësisht do t’i vinin trajnerit Conte në dispozicion edhe një sulmues të katërt me shumë eksperiencë, i gatshëm të kontribuojë sa herë që mungojnë titullarët.