19:03 / 18.09.2020
Morina: Fitore e madhe, të cilën do ta harrojmë që nesër!
Debutim ëndrrash për Arbërinë në elitën e futbollit kosovar. Kuqezinjtë kanë mundur në udhëtim Trepçën ’89 në ndeshjen hapëse të Superligës për edicionin 2020/21.
Skuadra e Arbnor Morinës fitoi me rezultat të pastër, 2:0.
Trajneri Morina përgëzoi lojtarët për karakterin pas ndeshjes.
“Fillimisht dua të uroj Arbërinë për inkuadrimin në Superligë për herë të parë, që është arritje e madhe. Sot skuadra ka treguar karakter të fortë”, deklaroi Morina për Art Sport.
“Djemtë treguan që kanë mundësi dhe mundësitë e tyre janë të mëdha”.
“Këtë fitore duhet ta harrojmë menjëherë qysh nga nesër, pasi që orari është shumë i ngjeshur dhe nuk ka komoditet”.
“Do të rigjenerohemi dhe do të mendojmë për takimet e ardhshme”, shtoi ai.























