​Veteranët e UÇK-së kundërshtojnë arrestimet e krerëve të OVL-UÇK-së
BKT
Lajme

​Veteranët e UÇK-së kundërshtojnë arrestimet e krerëve të OVL-UÇK-së

Të padrejta e spektakël po i quajnë arrestimet nga Gjykata Speciale të udhëheqësve të OVL-UÇK-së veteranët e Ushtrisë Çlirimtarë të Kosovës të Zonës së Nerodimës.

Veterani i UÇK-së, njëherësh sekretar në Degën e OVL- UÇK në Ferizaj, Nexhat Shahini, thotë se arrestimi i udhëheqësve të Organizatës së Veteranëve është spektakël.

Ai thotë se pamjet e arrestimit të udhëheqësve të Organizatës së Veteranëve irritojnë veteranët, pasi sipas tij, një veprim i tillë nuk ka qenë i nevojshëm.

Shahini: I japin shije të keqe veteranëve të luftës

“Spektaklet e paraqitura në mjetet e informimit lidhur me arrestimet e fundit vërtetë i japin shije të keqe veteranëve të luftës. Deri më sot është dëshmuar se të gjithë veteranët e luftës të cilët kanë qenë të hetuar apo të dyshuar për krime të luftës të gjithë janë lajmëruar vullnetarisht dhe asnjëherë nuk ka pasur nevojë për spektakle të tilla. Veprimet e fundit ngrisin neveri dhe irritojnë veteranët pasi që nuk ka qenë e domosdoshme një veprim i tillë, sepse është dëshmuar që veteranët janë gjithherë të gatshëm të japin llogari për atë për të cilën akuzohen”, thotë ai.

Vetë Gjykatën Speciale, Shahini e quan si të padrejtë dhe si politike, ku thotë se po gjykohet viktima dhe jo ai që ka bërë krime.

Shahini: Është Gjykatë politike

“Është Gjykatë politike, sikur të ishin të përfshira në gjykime të gjithë grupet e përfshira në luftën e Kosovës sigurisht që nuk do të kishte vend për ta kundërshtuar, por përderisa është e njëanshme dhe përndjek vetëm ushtarët e UÇK-së mendoj që është politike për t’ia bërë qejfin kërkesave të Serbisë”, thotë ai.

Veterani i UÇK-së Nazmi Hajdari, që ka qenë pjesë e Zonës Operative të Nerodimës, thotë se të gjitha arrestimet e ditëve të fundit janë një e padrejtë që po i ndodh Kosovës.

Hajdari: Arrestimet e fundit janë diçka të padrejta që i ka ndodhur Kosovës

“Arrestimet e fundit janë diçka e padrejtë që i ka ndodhur Kosovës. Lufta jonë, lufta e Ushtrisë Çlirimtare të Kosovës ka qenë luftë e drejtë, luftë mbrojtëse për lirinë e vendit, për çlirimin e atdheut. Shumë e padrejtë, arrestime të padrejta janë, nuk na ka takuar kjo me na ndodh në historinë e popullit tonë. Janë arrestime të padrejta, gjykimi i pjesëtarëve të UÇK-së është i padrejtë”, thotë ai.

Ai thotë se Gjykata Speciale është një e padrejtë që po i ndodh UÇK-së, pasi sipas tij nuk po gjykohet forca që ka bërë krime por po gjykohet lufta çlirimtare.

Hajdari: Forca që ka bërë krime nuk po gjykohet po gjykohet lufta çlirimtare

“Sigurisht që e dëmton, se ajo faktikisht në rast se po gjykohet vetëm një ushtri, nuk po gjykohen të dy forcat, forca që ka bërë krime nuk po gjykohet po gjykohet lufta çlirimtare. Është gjykim i padrejtë”, thotë ai.

Përndryshe, ditë më parë për më shumë se tetë orë është mbajtur e rrethuar ndërtesa e OVL-UÇK-së. Policia e EULEX-it ka arrestuar kryetarin e kësaj organizate Hysni Gucati dhe nënkryetarin Nasim Haradinaj.


MË SHUME NGA Lajme