Specialja i quan “spekulime” raportimet për kthim prapa të dosjes së Thaçit
Mediumi nga Shqipëria “ABC News” ka raportuar sot se Zyra e Prokurorit të Specializuar në Hagë ka kthyer për plotësim dhe prova shtesë dosjen në procesin ndaj Hashim Thaçit. Por një raportim të tillë e kanë mohuar nga Haga.
Zëdhënësi i Zyrës së Prokurorit të Specializuar, Christopher Bennett ka thënë se nuk i komentojnë spekulimet e mediave.
“Zyra e Prokurorit të Specializuar nuk komenton mbi spekulimet e mediave”, ka thënë zëdhënësi Christopher Bennet.
Presidenti i Kosovës, Hashim Thaçi, kreu i PDK-së Kadri Veseli dhe nëntë ish-ushtarë të UÇK-së janë akuzuar nga Prokuroria Speciale për krime lufte.
Aktakuza është dorëzuar tek gjyqtari i procedurës paraprake më 24 prill 2020.
Zyra e Prokurorit të Specializuar u paraqiti Dhomave të Specializuara të Kosovës një aktakuzë me dhjetë pika për shqyrtim prej Gjykatës, ku Presidenti Hashim Thaçi, kreu i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura gjatë kohës së Luftës së Kosovës.























