​Vetëvendosje uron llapjanët për fitoren e madhe në Podujevë

​Vetëvendosje uron llapjanët për fitoren e madhe në Podujevë

Lëvizja Vetëvendosje ka uruar të gjithë qytetarët e Llapit për fitoren e sotme në zgjedhjet për të parin e Podujevës, duke thënë se kjo paralajmëron ndryshimin e madh që sipas kësaj partie do të ndodhë në të gjithë Kosovën.

Kandidati i Vetëvendosjes Shpejtim Bulliqi ka fituar përballë kandidatit të LDK-së Nexhmi Rudari, parti kjo që për 20 vjet ka qeverisur me Podujevën.

E kjo fitore për Lëvizjen Vetëvendosje është shprehje e vullnetit të qytetarëve të kësaj ane për ndryshime në jetën e tyre të përditshme, e të cilën atyre do t’ua sigurojë gjatë mandatit të tij Shpejtim Bulliqi si kryetar i ri i komunës së Podujevës.

“Me të parën, pa hezitim e pa frikë, me zemrat zjarr e sytë gjithë shpresë, masivisht, qytetarët e deshën ndryshimin dhe ia zbardhën faqen komunës së tyre. Lëvizja dhe Shpejtim Bulliqi janë gati për detyrën e besimin që votuesi na dha. Shumë punë na presin e prej nesër jemi në shërbimin e secilit qytetar, pa dallim partie e prejardhjeje”, shkruan Vetëvendosje në Facebook.

Postimi i plotë:

Lëvizja i uron gjithë qytetarët e Llapit për këtë fitore plebishitare, me të cilën ata treguan besimin për kryetarin e ndryshimit, Shpejtim Bulliqin. Me të parën, pa hezitim e pa frikë, me zemrat zjarr e sytë gjithë shpresë, masivisht, qytetarët e deshën ndryshimin dhe ia zbardhën faqen komunës së tyre.

Kjo fitore është ndryshim i madh për Podujevën e fillimi i ndryshimit në të gjithë Kosovën, vullnet i madh i popullit, e përgjegjësi e madhe e jona. Lëvizja dhe Shpejtim Bulliqi janë gati për detyrën e besimin që votuesi na dha. Shumë punë na presin e prej nesër jemi në shërbimin e secilit qytetar, pa dallim partie e prejardhjeje.

Nuk do të lëmë qytetar pa përgjigje, as problem pa e adresuar. Do të jemi kudo ku do të thirremi e kudo ku do të ketë nevojë për ne. Vështirësitë e pandemisë do t’i përballojmë së bashku. Nuk do t’ju lëmë vetëm. Do t’i sigurojmë barnat dhe ambulancat, menaxhimin e shkollave e qendrave të mjekësisë familjare, përkujdesjen për nxënësit e të infektuarit. Mjekët e infermierët do të na kenë me vete, mësimdhënësit do të na kenë krah e gratë do të jenë pjesë e jona.

Ju qytetarë të komunës së Podujevës keni dhënë një mesazh të madh e i keni bërë një thirrje të fuqishme të gjithë Kosovës për rrugën që duhet të ndjekin e guximin që duhet të kenë. Na keni gëzuar shumë. Na e keni bërë zemrën mal. Jehona e kumbimit tuaj ndihet në të gjithë Kosovën.

Këto zgjedhje treguan se është shumë e mundshme të organizohen votime gjatë pandemisë, edhe në Kosovë, si në vendet e tjera. Populli po kërkon ndryshim, dhe vonesat veç sa i shtojnë pakënaqësitë për politikën e vjetër dhe korrupsionin e saj.


MË SHUME NGA Aktuale