Xhaçka: Përfshirja e Kosovës në UNESCO, domosdoshmëri
Ministrja për Evropën dhe Punët e Jashtme, Olta Xhaçka, mori pjesë në sesionin e 41-të të Konferencës së Përgjithshme të UNESCO, i cili përkoi me 75-vjetorin e krijimit të kësaj organizate.
Ministrja Xhaçka vlerësoi kontributin që Shqipëria jep në sistemin e OKB-së, teksa konfirmoi se vendi ynë mbështet reformat e ndërmarra nga UNESCO, për modernizimin dhe transformimin strategjik të saj.
Xhaçka solli edhe një herë në vëmendjen e të gjithë vendeve anëtare të organizatës, çështjen e anëtarësimit të Kosovës, mbështetur në parimin e gjithëpërfshirjes.
“Përfshirja e Kosovës, jo vetëm që do të ishte gjëja e duhur, por është një domosdoshmëri nëse më të vërtetë prioritet është adresimi i pretendimeve të përsëritura lidhur me ruajtjen e trashëgimisë kulturore dhe historike në Kosovë. Sepse e vërteta është që nuk ka mënyrë më të mirë dhe efikase për t’u marrë me ruajtjen e trashëgimisë kulturore, sesa përpjekjet e përbashkëta kombëtare dhe ndërkombëtare. Prandaj unë sinqerisht shpresoj që arsyeja do të prevalojë dhe Kosova do të jetë e mirëpritur këtu, në mënyrë që qytetarët e saj, shqiptarët, serbët, dhe të tjerët, t’i bashkohen këtij komuniteti të madh dhe të punojnë së bashku me shtetet e tjera në promovimin e parimeve dhe vlerave që na bashkojnë të gjithëve”, u shpreh ministrja Xhaçka në fjalën e saj.
Duke përshëndetur dhe uruar organizatën në këtë përvjetor, Xhaçka shprehu sigurinë për vijimësinë e rolit unik dhe kontributit të organizatës, në adresimin e sfidave globale.
Në Bullgari, të dielën më 14 nëntor mbahen zgjedhjet parlamentare dhe shpresat janë që pas zgjedhjeve të ketë përparim drejt arritjes së një zgjidhjeje, që do të hiqte pengesat për hapjen e negociatave mes BE-së dhe Maqedonisë së Veriut.
Moshapja e negociatave me Shqipërinë dhe Maqedoninë e Veriut edhe nga shumica e zyrtarëve të BE-së po shihet si e dëmshme për besueshmërinë e bllokut evropian në rajon.























