Alves refuzoi oferta nga Meksika për tu rikthyer te Barça
BKT
Sport

Alves refuzoi oferta nga Meksika për tu rikthyer te Barça

Mbrojtësi brazilian Dani Alves është rikthyer te Barcelona pas pesë viteve që kur ishte larguar nga “Camp Nou”, dhe tani e ka bërë të qartë që opsioni i tij i vetëm ka qenë Katalunia edhe pse kishte pasur oferta për të kaluar në Ligën e Meksikës.

Mbrojtësi veteran kishte fituar plot 23 trofe gjatë aventurës së tij të parë me “Blaugranët, ku kishte qenë pjesë e formacioneve legjendare nën urdhrat e trajnerëve si Pep Guardiola e Luis Enrique.

Tani, Alves është rikthyer te Barcelona që t’i ndihmojë klubit brenda dhe jashtë fushave për të kaluar krizën që e ka kapluar, dhe për tu bashkuar përsëri me ish-bashkëlojtarin e tij Xavi, ku ky i fundit u rikthye te gjigandi katalunas në detyrën e trajnerit.

Dëshira e Alves për tu rikthyer në Barcelonë ishte aq e madhe sa që mbrojtësi brazilian kishte refuzuar dy oferta nga klubet e Ligës së Meksikës, ku njëra nga to ishte marrëveshje dy vjeçare me një pagë më të mirë se ajo e tanishmja te Barça.

Alves e kishte bërë të qartë që nga fillimi se preferenca e tij është që të rikthehet te Barcelona, ku ylli brazilian nuk ka ngurruar të pranojë faktin që kishte ëndërruar për një aventurë të dytë në stadiumin “Camp Nou”.