Rezolutat e Kuvendit pa asnjë efekt juridik
Kosovare Gashi, Radio Kosova
Kuvendi i Kosovës në shumë raste për një çështje të caktuar miraton rezoluta. Por ato nuk kanë asnjë efekt juridik.
Sipas Ehat Miftaraj, nga Instituti i Kosovës për Drejtësi, rezolutat e miratuara në Kuvendin e Kosovës më shumë kanë karakter deklarativ, pasi të njëjtat nuk janë të obligueshme të zbatohen.
“Rezolutat e miratuar në Kuvend, më shumë kanë karakter deklarativ, nëpërmjet të cilave jepet përkushtimi i Kuvendit të Kosovës për një çështje të caktuar, por në aspektin juridik nuk kanë ndonjë efekt obligues qoftë për Kuvendin qoftë për institucionet e tjera”, ka thënë Miftaraj për Radio Kosovën.
Monitoruesja e punës së Kuvendit nga Instituti Demokratik i Kosovës, Agnesa Haxhiu, ka thënë për Radio Kosovën se rezolutat zakonisht janë produkt i debateve parlamentare apo interpelancave, që kanë për qëllim dhënien e rekomandimeve për përmirësimin e një çështjeje të caktuar. Por kjo nuk ndodh, pasi sipas Haxhiut, Kuvendi nuk ka mekanizëm të veçantë për monitorimin e zbatimit të rezolutave.
“ Kuvendi ka mungesë të mekanizmave që ia mundësojnë te përcjellë zbatimin e rezolutave. Prandaj në shumicën e rasteve rezolutat janë një shfrytëzim i debatit publik që ndodh në një kohë të caktuar edhe shumë rrallë ato mbërrijnë të japin efektet e tyre në praktikë”, ka deklaruar Haxhiu për Radio Kosovën.
Sekretari i Kuvendit të Kosovës, Ismet Krasniqi, tregon për Radio Kosovën se që nga themelimi Kuvendi i Kosovës ka miratuar 65 rezoluta. Vetëm në këtë legjislaturë deputetet e kuvendit kanë votuar për 5 rezoluta.























