Rexha: AGK falënderon RTK-në për mbështetjen e gazetarëve ukrainas
Institucionet e Kosovës kanë ofruar mbështetje ndaj gazetarëve ukrainas në strehimin dhe ofrimin e kushteve të punës në fushën e gazetarisë, duke u bërë shteti i parë, jo vetëm në rajon, por edhe në Evropë, që merr një hap të tillë.
Kryetari i AGK-së, Xhemajl Rexha, theksoi se ka një muaj që janë përgatitur në pritjen e gazetarëve ukrinas, duke shtuar se, si AGK është në bashkëpunim me dy shoqata të gazetarëve ukrainas, ku njëra nga anëtaret e një prej këtyre shoqatave është Lyudmila Makay.
Rexha më tej shtoi se Qeveria e Kosovës dhe AGK u ofrojnë gazetarëve ukrainas kushte pune për ushtrimin e aktivitetit të tyre profesional.
‘’U ofrohen kushte pune, kurse të gjuhës shqipe dhe të anglishtes, etj., si dhe strehim, e gjitha kjo për ta ushtruar profesionin e gazetarit’’, theksoi Rexha.
Ai falënderoi vendimin e Bordit dhe menaxhmentit të RTK-së, në ofrimin e kushteve të punës për 4 gazetarë të Ukrainës, duke shtuar se këtë veprim kanë bërë edhe televizione tjera private,
‘’Kjo tregon solidaritetin e theksuar ndaj gazetareve ukrainas’’, shtoi më tej Rexha në emisionin "Imazh i ditës", në RTK./M.M.























