Abdixhiku tregon përse LVV nuk do Komision Hetimor
Kryetari i LDK-së, Lumir Abdixhiku, deklaroi se shpërthimi i skandalit me ambasadorin në Slloveni dhe tani zgjerimi i tij edhe në rajon, është arsyeja e vërtetë e rezistencës së pushtetit ndaj formimit të Komisionit Hetimor në Kuvend.
Abdixhiku u shpreh se asnjë arsyetim refuzues i LVV-së nuk kishte kuptim.
“As arsyetimi i luftës në Ukrainë, prandaj - merreni me mend - s’duhej të bëhej ky hetim; as preteksti i ligjshmërisë së nënshkrimeve nuk kishin kuptim”, tha kreu i LDK-së.
Sipas tij, vetëm një hall i madh prodhonte arsyetime të pashpresa si këto.
“Por sa më i zëshëm refuzimi i tyre, aq më i domosdoshëm bëhej insistimi ynë. Sot, hetimi parlamentar nuk ka alternativë”.
Kryetari i LDK-së deklaron se ky skandal, dhe të tjera skandale të renditura në shpenzimin e plot 120 milionë eurove edhe shtrenjtimin e faturave deri në 100%, duhet të gjejnë dritë.
“ Kriza energjetike është një piramidë keqmenaxhimi, neglizhence e tani dhe krimi. Këtë piramidë duhet dhe do ta shembim të gjithë”.
Për këtë arsye, kryetari i partisë së dytë opozitare në Kuvendin e Kosovës tha se bojkoti ynë votues në Kuvend, nuk merr fund pa formimin e Komisionit Hetimor për Energji.
“Sepse s’ka ligj, s’ka temë e s’ka çështje tjetër më me rëndësi se sa kjo me energji. Do ta zbardhim të vërtetën herët apo vonë”.
Prandaj, ai tha se deri atëherë, tërheqja e menjëhershme e ambasadorit të komprometuar tani, formimi i Komisionit Hetimor, e shkarkimi i Bordit të Rregullatorit - që ende refuzon vendimin e Gjykatës rreth tarifave - janë hapa të parë në këtë drejtim. (J.M)























