Në javën evropiane të imunizimit ka filluar vaksinimi edhe nëpër shkolla
Venera Xhoxhaj- Adili/ RTK
Në javën evropiane të imunizimit ka filluar vaksinimi edhe nëpër shkolla. Vaksinat sipas kalendarit të rregullt po aplikohen te nxënësit e klasave të para dhe ata të gjashta.
Ora e fundit e mësimit nuk ishte njësoj si ditëve të tjera për nxënësit e shkollës `Xhavit Ahmeti` në kryeqytet.
Filloristët e klasës së gjashtë po dëgjojnë informata shëndetësore pasi do të vaksinohen sipas programit të rregullt të vaksinimit.
Mbulueshmëria e këtij procesi arrin në rreth 90% shifër kjo që ka pësuar rënie të lehtë edhe për shkak të pandemisë.
“Mundet me pas lëvizje për shkak të Covid-19 mirëpo nëpër shkolla është mirë sepse është vaksinim i rregullt dhe nuk ka probleme. Por problem mundet me pas te parashkollorët”, tha Naim Sveçla, Mjek nga qendra e vaksinimit
Kjo praktikë e vaksinimit në shkolla realizohet për çdo vit.
“Tani kemi filluar me klasat e gjashta dhe ndërkohë në ndërrimin e pasdites do të vazhdojmë me klasët e para . Janë 4 paralele klasë të gjashte dhe po aq klasë të para”, tha për RTK Xhavit Berisha, Drejtori i shkollës "Xhavit Ahmeti".
Ky proces disa sekondash nuk dukej të ishte fort i këndshëm për fëmijët por mjekët sigurojnë se është i vlefshëm për jetë të shëndetshme. Ekipet mjekësore do të realizojnë vaksinimin në të gjitha shkollat te fëmijët e moshës përkatëse.























