Sulmi në Gramsh, Osmani: Autorët të mbajnë përgjegjësi
BKT
Lajme

Sulmi në Gramsh, Osmani: Autorët të mbajnë përgjegjësi

Emine Hoti/RTKlive

Presidentja e Kosovës, Vjosa Osmani ka njoftuar se ka folur me presidentin e Shqipërisë, Bajram Begaj për sulmin e djeshëm ndaj ushtarëve në Gramsh.

Osmani përmes një postimin në Twitter ka thënë se autorët e këtij sulmi duhet të mbajnë përgjegjësi.

“Kam folur me Presidentin Bajram Begaj për sulmin e fundit ndaj ushtarëve shqiptarë në fabrikën e Gramshit. Të lënduarve u urojmë shërim të shpejtë. Autorët e këtij sulmi duhet të mbajnë përgjegjësi”, ka shkruar ajo.

Osmani ka thënë se institucionet tona janë të gatshme të ofrojnë çdo mbështetje të nevojshme,  teksa u ka uruar shërim të shpejtë të lënduarve.

Kryeministri Kurti dënon incidentin në Gramsh

Kryeministri i Kosovës, Albin Kurti e ka dënuar incidentin në uzinën ushtarake në Gramsh, ku dy shtetas me pasaporta ruse dhe një ukrainase kanë tentuar të hyjnë mbrëmë.

Sipas njoftimit, Kryeministri Kurti u ka dëshiruar shërim të shpejtë dy ushtarakëve shqiptarë të lënduar nga sulmi me sprej neoparalizues.

“Urojmë që hetimet që po vijojnë nga autoritetet e Shqipërisë të zbardhin sa më shpejtë rrethanat e ngjarjes”, thuhet në njoftimin e Qeverisë.

Tutje në njoftim thuhet se Ministria e Mbrojtjes së Kosovës është në kontakt me Ministrinë e Mbrojtjes së Republikës së Shqipërisë.


MË SHUME NGA Lajme