FSK-së i shtohen edhe specialistët e parë për sulme ajrore
Naser Mekolli /RTKlive.com
Ministri i Mbrojtjes i Kosovës, Armend Mehaj, ka bërë sot të ditur se Forcës së Sigurisë së Kosovës (FSK) i janë shtuar edhe specialistët e parë për sulme ajrore.
Mehaj, në një postim në Facebook, shkruan se bashkë me kursantët e Gardës Kombëtare të Iowa-s, dy ushtarakët tanë përfunduan me sukses kursin e sulmimit ajror dhe rrugëzbulimit.
“Bashkë me kursantët e Gardës Kombëtare të Iowa-s, dy ushtarakët tanë përfunduan me sukses të lartë kursin e sulmimit ajror dhe rrugëzbulimit. Ky kurs tejet sfidues teston forcën, shkathtësinë, qëndrueshmërinë, besimin dhe aftësinë e kursantëve për të performuar në lartësi gjatë operacioneve luftarake”, ka shkruar Mehaj.
Falënderim dhe mirënjohje e thellë për partnerët tanë, Gardën Kombëtare të Iowa-s për këtë mundësi të shkëlqyer, sikur edhe gjithë mbështetjen e mbi një dekade, thotë ai.
Ndryshe, sekretari amerikan i Shtetit, Antony Blinken, të premtën, ka paralajmëruar ndihmë ushtarake prej 2 miliardë dollarësh për Ukrainën, por edhe për disa nga shtetet e Ballkanit përfshirë Kosovën, Shqipërinë, Bosnjë e Hercegovinën, Malin e Zi dhe Maqedoninë e Veriut.
Presidentja e Kosovës, Vjosa Osmani, me këtë rast, ka falënderuar Sekretarin amerikan të Shtetit, Antony Blinken, për angazhimin e tij të palëkundur për paqen dhe sigurinë në rajonin tonë dhe më gjerë.



























