FSK gëzon bashkëpunim të afërt me ushtrinë Gjermane
Fadil Sertolli / RTKlive
Përmes një njoftimi nga FSK-ja, bëhet e ditur se komandanti i FSK-së, gjenerallejtënant Bashkim Jashari, priti me ceremoni zyrtare shefin e Mbrojtjes së Gjermanisë, gjeneral Eberhard Zorn.
Sipas njoftimit për media, thuhet se të dy gjeneralët diskutuan lidhur me bashkëpunimin e afërt që FSK e gëzon me ushtrinë gjermane dhe potencialin për zgjerimin e këtij bashkëpunimi.
“Më këtë rast gjeneral Jashari falënderoi gjeneralin Zorn për përkushtimin e tij dhe të ushtrisë gjermane për të ndihmuar FSK-në, në ngritjen dhe zhvillimin e kapaciteteve ushtarake. Ushtria e Gjermanisë është njëra nga kontribuesit më të mëdhenj me trajnime, ekspertizë dhe donacione të pajisjeve ushtarake për FSK-në, me fokus logjistikën’, thuhet mes tjerash në njoftim.
Në takim, po ashtu bëhet e ditur se është diskutuar edhe situata e sigurisë në Kosovë, rajon dhe me gjerë.
Në fund të vizitës, u shfrytëzua rasti që pala gjermane zyrtarisht t’i dorëzojë FSK-së, donacion veshje mbrojtëse specialistike kundër mjeteve shpërthyese për ekipet e deminimit/EOD të FSK-së.























