Gjykata dënoi ministren Rozeta Hajdari me 700 euro, ajo s’deklaroi pasurinë
J.Musliu/RTKlive
Është dënuar me gjobë prej 700 eurosh nga Gjykata Themelore në Prishtinë, ministrja e Industrisë, Ndërmarrësisë dhe Tregtisë, Rozeta Hajdari.
Ajo u dënua për shkak të mosdeklarimit të pasurisë për vitin 2020 brenda afatit ligjor.
Njoftimin e bëri të ditur Gjykata Themelore në Prishtinës, por duke dhënë vetëm inicialet e ministres në fjalë.
“E akuzuara R.H (Rozeta Hajdari) është shpallur fajtor dhe është dënuar me gjobë në shumën 700 euro, i cili dënim do të ekzekutohet në afat prej 15 ditëve nga dita kur ky Aktgjykim të bëhet i plotfuqishëm”, shkruan në njoftim.
Në aktvendimin e gjykatës theksohet se Hajdari, në cilësinë e zyrtares së lartë publike, si ministre e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike në Qeverinë e Kosovës, duke qenë e vetëdijshme për detyrimin e saj ligjor, nuk e ka deklaruar pasurinë ashtu siç e kërkon Ligji për deklarimin, prejardhjen dhe kontrollin e pasurisë të zyrtarëve të lartë publik.
Më 14 tetor të këtij viti Prokuroria Themelore në Prishtinë kishte ngritur aktakuzën ndaj ministres Hajdari për veprën penale “Mosraportim ose raportim i rremë i pasurisë, i të ardhurave, i dhuratave, i dobisë tjetër materiale apo detyrimeve financiare”.
Hajdari kishte pranuar paraprakisht fajësinë para gjykatës duke thënë se ishte krijuar konfuzion pasi ishte shtyrë afati për deklarim të pasurisë së zyrtarëve publikë.























