Chollet: Partneriteti SHBA-Kosovë është i palëkundur
BKT
Foto: Derek Chollet/Twitter
Lajme

Chollet: Partneriteti SHBA-Kosovë është i palëkundur

Jeton Musliu/RTKlive

“Partneriteti i SHBA-së me Kosovën është i palëkundur”. Kështu deklaroi në fund të takimeve në Prishtinë, këshilltari i lartë i Departamentit amerikan i Shtetit, Derek Chollet.

Me një deklarim në llogarinë e tij në Twitter, e duke postuar disa fotografi nga takimet me zyrtarët e lartë të shtetit dhe partive politike në Kosovë, Chollet tha se-“është mirë të takohet me presidenten Vjosa Osmani”.

“Partneriteti ynë SHBA-Kosovë është i palëkundur”, shkroi ai. “Ne e lavdërojmë Kosovën për solidaritetin me Ukrainën në miratimin e sanksioneve, mbështetjen e saj ndaj refugjatëve dhe gazetarëve si dhe dënimin e luftës së Putinit”, deklaroi Chollet.

 “Mirënjohës për bujarinë e Kosovës në pritjen e të evakuuarve dhe refugjatëve afganë”.

Në lidhje me këtë vizitë, u deklarua edhe ambasadori i SHBA-së në Kosovë, Jeff Hovenier.  

Duke ripostuar këtë deklarim,ai shtoi gjithashtu se -“marrëdhëniet mes dy vendeve janë të forta”.

Hovenier tha se Chollet u angazhua me të gjithë liderët, përfaqësuesit e qeverisë, shoqërisë civile e gazetarët.

Chollet dje vizitën në Kosovë e nisi me presidenten e vendit, Vjosa Osmani, kryeministrin Albin Kurti, e partive politike në vend.

Të mërkurën,Chollet pati edhe një takim me gazetarë në Prishtinë.

 “Kosova duhet të përmbushë të gjitha zotimet në kuadër të dialogut, përfshirë edhe formimin e Asociacionin e komunave me shumicë serbe” dhe se presin nga "Qeveria e Kosovës të vendosë disa propozime në tryezë".

Kështu tha ai më 11 dhjetor. "Ne besojmë se Asociacioni është një çështje urgjente, është një çështje urgjente në agjendën e dialogut, ka marrë një rëndësi edhe më të madhe pas ngjarjeve të fundit në veri", tha Chollet.

Ai shtoi se SHBA-ja nuk mbështet diçka që i ngjan Republika Srpskës.

"Ne nuk po kërkojmë nga Kosova të mbështesë asnjë marrëveshje që nuk është në përputhje me Kushtetutën dhe vendimin e Gjykatës Kushtetuese të vitit 2015".

Gjatë ditës së sotme (e enjte) ai do të vizitojë edhe Serbinë ku do të ketë takime me zyrtarët e shtetit fqinj.


MË SHUME NGA Lajme